PRESIDENTE DI FIFA, GIANNI INFANTINO I PRESIDENTE DI FFK GILBERT MARTINA TA HIBA KONSULTA BILATERAL DURENTE KUMBRE DI FIFA NA MIAMI!

PRESIDENTE DI FIFA, GIANNI INFANTINO I PRESIDENTE DI FFK GILBERT MARTINA TA HIBA KONSULTA BILATERAL DURENTE KUMBRE DI FIFA NA MIAMI!

 

Miami, 17 di yüni 2025 – Durante Kumbre di FIFA, ku a tuma lugá djaluna 16 di yüni na Miami na okashon di Kampeonato Mundial di Klubnan, presidente di FIFA señor Gianni Infantino a hiba un konsulta bilateral ku presidente di Federashon Futbòl Kòrsou (FFK), sr. Gilbert Martina. FFK tabata representá dor di sr. Kenneth Bernabela, miembro di direktiva di FFK i sr. Gilbert Martina, presidente di FFK.

Enfoke di e kumbre di FIFA 2025 tabata algun desaroyo futbolístiko importante mundialmente. Den e kuadro ei a para ketu na e kresemente fuerte di e Programa Forward di FIFA di kual e prespuesto pa kada miembro di federashon a subi di $ 250.000 nuebe aña pasá te mas ku $8 mion pa e siklo aktual di 2023 – 2026. Ademas FIFA a enfatisá e importansia di futbòl femenino komo prioridat stratégiko pa kada federashon di futbòl. Den e kuadro ei a indiká ku for di e promé kampionato mundial pa hende muhé na 1991 entre tanto sinku pais a bira kampion mundial a kontrali di ocho serka e hende hòmbernan for di 1930 – loke ta suprayá e enorme potensial di futbòl femenino. Desaroyo di futbòl hubenil tambe a haña bastante atenshon, inisiativanan manera “FIFA Football for Schools program” (pa skolnan), “FIFA Pitch” pa traha vèlt i e festival anual “FIFA Youth Festival” pa ekiponan U13-U15 di tur 211 federashonnan miembro.

Tambe plataformanan nobo a keda diskutí, manera “FIFA Series”, un bentana èkstra di partidonan internashonal di entrenamentu i “FIFA Matchmaking”, un sistema digital ku kual ekiponan nashonal por fasilmente haña kontrikantenan pa partidonan amistoso.

Despues di e seshon aki, un kòmbersashon pèrsonal entre señor Infantino i sr. Martina a tuma lugá. Durante di e enkuentro aki e presidente di FFK a enfatisá e nesesidat di un reorganisashon riguroso i profeshonalisashon di e federashon di futbòl, inkluso rekrutamentu di pèrsonal di maneho kualifiká ku no solamente e konosementu i eksperiensia adekuá, pero tambe ku e aktitut, étika i mentalidat apropiá. Den e kuadro aki tambe a papia riba e promé buki di sr. Martina titulá  Healthy Minds – Healthy Nation (Mentenan sano – Nashon sano), ku lo keda publiká na final di 2025/kuminsamentu di 2026.

Presidente Infantino tabata hopi interesá den e título i e mensahe su tras, ya ku e mes a keda konfrontá ku e konsekuensianan di frakasonan di maneho i falta di kompas moral ora ela kuminsá na FIFA.

Adishonalmente sr. Martina a presentá e puntonan di lansa di e plan di maneho stratégiko di FFK pa 2025-2029, ku enfoke riba desaroyo di kapasidat di entrenadónan, rèfrinan i lidernan di klupnan, reforsamentu di futbòl hubenil i femenino pa via di programanan di desaroyo strukturá i instalashon di infrastruktura ku ta suma na e nesesidatnan di tur selekshon nashonal.

Na final di e enkuentro presidente Infantino a kompartí e siguiente mensahe via di su kuenta di Instagram:

“Mi tabata tin un enkuentro fruktífero ku e presidente elekto nobo di e Federashon di Futbòl Kurasoleño, Gilbert Martina, tokante e desaroyo i e struktura di futbòl na su pais. E selekshon nashonal maskulino ta prestando hopi bon den rondanan di kalifikashon pa Mundial 2026 i gustosamente lo mi ke presensiá un di nan partidonan ora ku nan ta hunga mas lat den e aña aki den e próksimo ronda. FIFA ta orguyoso di krea oportunidat pa tur hende pa por realisá nan soño riba tarima mundial i nos lo sigui sostené presidente Martina i su tim a través di e programanan di desaroyo di FIFA.”

Sr. Martina a ekspresá su gratitut na presidente Infantino i sr. Mattias Graffstörm pa e konfiansa ku nan a duna i e sosten for di momento di kambio di direktiva dia 10 di aprel 2025.  Di paso e la yama danki na señores Elkhan Mammadov (Chief Member Association Officer, FIFA) i Jair Bertoni (Director Member Associations Americas, FIFA) pa nan kompromiso konstante na e desaroyo progresivo di futbòl Kurasoleño.

 

 

Potrèt 1: Presidente Gianni Infantino ta entregá simbólikamente un bala di futbòl na Gilbert Martina, komo señal di e forsa di unión di e wega.
Potrèt  2: d.l.p.r.: Kenneth (Bob) Bernabella, Gianni Infantino, Gilbert Martina i Mattias Graffstörm

 

Pa mas informashon òf pregunta por tuma kontakto ku:

Liviéna Rijnschot +5999-511-8046