CBCS ta mantené su maneho monetario intakto den un ambiente di insertidumbre kresiente na nivel mundial

 

 

 

CBCS ta mantené su maneho monetario intakto
den un ambiente di insertidumbre kresiente na nivel mundial

WILLEMSTAD/PHILIPSBURG — Dia 19 di yüni 2025, Centrale Bank van Curaçao en Sint Maarten (CBCS) a disidí di mantené su maneho monetario intakto. Esei ta nifiká ku e tasa di interes
ofisial (‘beleningsrente’) lo keda na 4,75% i e porsentahe di reserva obligatorio, na 18,50%. E último biaha ku a ahustá e instrumentonan akí di maneho monetario ta na novèmber 2024.
Na e momento ei, a redusí ámbos ku 0,50 punto porsentual en bista di e posishon sólido di divisa i e kobertura di importashon adekuá di e union monetario. Aunke e indikadónan ekonómiko i monetario di Kòrsou i Sint Maarten a keda sólido i generalmente konsistente ku e pronóstikonan anterior, e riesgonan internashonal ta kresiendo i, debí na esei, e perspektivanan mundial ta birando ménos stabil. Oumento di insertidumbre den komèrsio i merkado finansiero internashonal, tenshon geopolítiko kresiente i e echo ku Reserva Federal Estadounidense (Fed) no a sigui baha su tasa di interes ofisial ta algun di e faktornan ku CBCS a tene kuenta kuné den su desishon. En bista di e insertidumbrenan, CBCS ta keda kouteloso den su maneho. Lo sigui vigilá e desaroyonan ekonómiko doméstiko i internashonal djaserka i ahustá e maneho si ta nesesario.
Ta premirá ku e défisit riba kuenta koriente di balansa di pago komo porsentahe di PIB, ta baha di 16,8% na 2024 pa 15,0% na 2025. Esaki ta debí prinsipalmente na un oumento den eksportashon neto di produkto i servisio, impulsá pa un nivel mas haltu di eksportashon i un bahada den importashon. Segun espektativa, un oumento den entrada di divisa di aktividat turístiko na ámbos pais di e union monetario lo ta e motor prinsipal tras di e oumento den eksportashon, miéntras ku e bahada premirá den importashon lo ta debí prinsipalmente na e efekto ku e preis mas abou di petroli riba merkado internashonal lo tin riba kosto total di importashon. En kambio, ta premirá un
subida den importashon di merkansia no petrolero na ámbos pais di e union monetario, impulsá pa un oumento den gastu di turista i un demanda doméstiko mas haltu.
Te asina leu, te ku dia 2 di yüni, reserva ofisial bruto a oumentá ku Cg 203,5 mion e aña akí. Ta premirá ku pa fin di aña, e reserva lo a subi ku Cg 51,8 mion, ya ku, segun pronóstiko, finansiamentu eksterno i transferensia di kapital lo ta mas haltu ku e défisit riba kuenta koriente di e balansa di pago. Den kobertura di importashon tambe tin un tendensia kresiente. Segun proyekshon, kobertura promedio di importashon lo oumentá di 4,4 luna na 2024 pa 4,7 luna na 2025, kedando kómodamente riba e norma di tres luna.
No opstante, situashon pafó di nos union monetario a deteriorá signifikativamente den e último lunanan i e desaroyo akí por tin efekto riba sierto indikadó monetario importante. Spesialmente e eskalashon di medida (di represaya) komersial i e insertidumbre persistente riba tereno di maneho komersial a oumentá tenshon komersial internashonalmente, afektando stabilidat di kadena di suministro. E oumento di tenshon geopolítiko na Europa Oriental i Medio Oriente tambe por perturbá e kadena mundial di suministro i hiba na oumento di preis di krudo i otro produktonan. E desaroyonan akí ta un riesgo supstansial pa ekonomia manera di Kòrsou i Sint Maarten ku ta
dependé bastante di importashon, ya ku oumento den kosto di importashon por tin un efekto negativo riba e balansa di pago i, p’esei mes, riba reserva ofisial bruto.
En bista di e desaroyonan akí, CBCS a disidí ku lo mantené e tasa di interes ofisial na 4,75%. Esaki ta kuadra ku maneho di Fed tambe, ku dia 18 di yüni último a disidí di mantené su tasa ofisial na 4,50%. E desishon akí di Fed pousa fleksibilisashon monetario tin di aber ku e oumento di insertidumbre komo resultado di e deterioro ku por opservá den e ambiente internashonal, entre otro den forma di e oumento di tenshon komersial i geopolítiko. Por lo demas, CBCS lo mantené e porsentahe di reserva obligatorio na 18,50%. Tambe, CBCS lo sigui ofresé sertifikado di depósito ku tasa atraktivo durante e emishonnan semanal, pa asina mas likides di e bankonan por keda riba merkado doméstiko i yuda mantené un posishon sólido di divisa.

Willemstad, 20 di yüni 2025
CENTRALE BANK VAN CURAÇAO EN SINT MAARTEN