Garantisando depósito di doño di kuenta te na un suma máksimo Sistema di Garantia di Depósito a drenta na vigor pa Kòrsou

Garantisando depósito di doño di kuenta te na un suma máksimo
Sistema di Garantia di Depósito a drenta na vigor pa Kòrsou

WILLEMSTAD/PHILIPSBURG – For di awe, 1 di yüli 2025, Sistema di Garantia di Depósito (DGS) a drenta na vigor ofisialmente pa Kòrsou. E logro akí ta nifiká ku, di awor padilanti, si bo ta un doño di kuenta na Kòrsou, bo depósitonan ta protehá a base di un sistema di garantia ankrá den lei. Esaki lo kontribuí na mas konfiansa i stabilidat den nos sistema finansiero. DGS ta protegé plaka di e doñonan di kuenta den kaso ku un instituto di krédito no por kumpli ku su obligashonnan. Pa union di krédito, e sistema akí ta kubri te Cg 25.000 pa kada doño di kuenta na kada union di krédito. Pa otro instituto di krédito, manera bankonan i fondonan di spar, e suma máksimo ta Cg 50.000.
No tin nada ku un doño di kuenta mester hasi pa risibí e protekshon akí. Pa lei, tur depósito garantisá bou di e sistema akí ta kubrí outomátikamente.
Introdukshon di DGS na Kòrsou ta den liña ku e desaroyonan i práktikanan rekonosí na nivel internashonal ku e meta di hasi sektor finansiero mas resiliente, garantisá protekshon di doño di kuenta i mantené stabilidat ekonómiko. E reda di siguridat ku DGS ta ofresé ta oumentá e konfiansa ku e doñonan di kuenta tin den nos sistema finansiero.
Centrale Bank van Curaçao en Sint Maarten (CBCS), den kolaborashon estrecho ku Ministerio di Finansa di Sint Maarten, ta trahando riba introdukshon di DGS pa Sint Maarten tambe. Esei lo ofresé e mesun protekshon na esnan ku tin kuenta na e institutonan di krédito establesí na Sint Maarten.
CBCS ta enkargá ku implementashon di DGS. E parti operashonal di e implementashon lo sosodé den kolaborashon ku Fundashon Fondo di Garantia di Depósito, un fundashon ku ta lantando pa atministrá e fondonan ku lo reservá pa paga e doñonan di kuenta ku bini na remarke.
CBCS lo sigui kolaborá estrechamente ku e institutonan di krédito i demas stakeholdernan pa tene públiko informá tokante funshonamentu di DGS i tokante su benefisionan. P’esei mes, CBCS a lansa e wèpsait ofisial di DGS. Pa mas informashon, bishitá https://dgs.cw/ òf tuma kontakto ku e helpdesk di DGS na DGS@centralbank.cw. Den e di tres kuartal di e aña akí, CBCS lo lansa un kampaña di informashon pa públiko por haña sa mas detaye tokante e Sistema di Garantia di Depósito.

Willemstad, 1 di yüli 2025
CENTRALE BANK VAN CURAÇAO EN SINT MAARTEN