Djabièrnè 4 di yüli 2025, Komishon Sentral a reuní pa deliberá ku gerensia di 2Bays/RdK i asina kumpli ku petishon fechá 12 di yüni 2025 di miembronan di parlamento sra. Susanne Camelia- Römer, sra. Giselle Mc William, sr. Quincy Girigorie i sr. Shaheen Elhage.

E reunion a kuminsá ku un presentashon di sr. Patrick Newton di 2Bays/RdK riba e tópiko aki.

Miembronan di Parlamento a haña oportunidat di 10 minüt pa hasi pregunta, di kual diferente miembro a hasi uso di dje. Despues di a pidi un ora pa prepará e kontestanan, gerensia di 2 Bays/Rdk, den persona di sr. Newton, a kontestá e esakinan.

Seguidamente Komishon Sentral a sigui ku e tratamentu di punto 2 ku tabata “Proposishon pa partisipá na Tripartit i “IPKO” kual lo tuma lugá di 26 pa 29 di sèptèmber 2025 na Den Haag.” Sr. Presidente a presentá e proposishon i sr. David Seferina Presidente di Komishon a splika e proposishon na miembronan di Parlamento i e esaki a keda aprobá pa Komishon Sentral.

Ku e último reunion aki Parlamento a drenta e temporada ofisial di reseso ku lo terminá riba 22 di ougùstùs 2025.