Baluartenan i hóben prospektó di bario 2025 a haña nan honor.
Baluartenan i hóben prospektó di bario 2025 a haña nan honor.
WILLEMSTAD: Djabièrnè 4 di yüli 2025 na Acoya Curaçao Resort a tuma lugá un bunita seremonia di rekonosementu pa tur e baluartenan i hóben prospektó di 2025 di diferente barionan aki na Kòrsou. Un total di 12 baluarte i 9 hóben prospektó a risibi nan rekonosementu durante e anochi aki.
Na e okashon aki sra. Scarlette La Reine di Plataformá Bandabou a presentá un bunita reflekhon spiritual titulá Boluntarismo. Tambe a hiba palabra sra. Jeannette Pablo presidente di Unidat di Bario ku a pone enfasis riba e responsabilidat ku bo ta karga komo baluarte i hóben Prospektó i tambe kuantu persona den nos komunidat durante añanan ku a pasa a bira baluarte òf hóben prospektó di un bario aki na Kòrsou.
E anochi a kontinua den un ambiente ameno i festivo ku diferente presentashon e.o di sra. Anamarie Cijntje i Andira Reenis ku tur dos tabata ganadó di Kanto pa Kòrsou, tambe grupo di baile ‘Na mi Manera’ ku a duna diferente show di baile folklorikó i tambe tabata tin entretenimentu musikal di T & A Entertaiment ku a deletá tur presente ku bon musiká. Finalmente e baluartenan i hóben prospektó di 2025 a risibi nan plaka di merito serka presidente di Unidat di Bario sra. Jeanette Pablo.
E siguiente baluartenan i hóben prospektó a risibi nan rekonosementu:
Pa bario di Wèstpunt Silvio Alberto i Syderiane Soliana, Soto Adria Koomen-Djaoen i Destiny Goedgedrag, Tera Kòrá Jacqueline Alberto i Lushendro Regina Ambrosina, Domi /Otrabanda Carmen Schoobaar, Sta.Helena Judith Helouise Themen i Anderson Statius, Buena Vista Enith Nicastia – Monte i Arjenette Wernet-Bernardus, Suffisant Frederick (Billy) Adams i Izair Leolina, Seru Papaya Servania Martina, Koraal Specht Monique Maria i Sabrina Leesly, Fuik Lupe B. Uranie e/v van de Sande i Denzell Russell, Montaña Erick de Windt i Marciano Lantveld Bridgewater i pa bario di Sta.Rosa Theo Vos.
Komishon di Baluarte Award 2025 ta sumamente kontentu di por a duna honor na tur e baluartenan i hóben prospektó di 2025 i kier a gradisi Gobiernu di Kòrsou pa su koperashon duná na e seremonia aki i tambe tur ku ta kere den e trabou di e baluarte i hóben prospektó di bario aki na Kòrsou.