PAR ta pidi informashon pa garantisá transparensia i integridat di Parlamento !!

 

PAR ta pidi informashon pa garantisá transparensia i integridat di Parlamento !!

 

Ku hopi preokupashon Frakshon di PAR a tuma nota atrobe di informashonnan den medionan di komunikashon enkuanto supuesto iregularidatnan den maneho (finansiero) di Kas di Kòrsou.

Loke ta hasi e asuntu mas grave, ta ku e biaha aki e supuesto “sospecho di iregularidatnan” ta relatá na relashon finansiero entre Parlamento di Korsou i Kas di Kòrsou.

Frakshon di PAR ta konsiente ku sospecho di e indole aki ta trese un mancha skur riba tantu Kas di Kòrsou komo Parlamento di Kòrsou i mester wòrdu tratá ku e urgensia i transparensia nesesario.

Si den pasado, Presidente di Parlamento di Kòrsou, den kuadro di transparensia i integridat di e organo a entrega keho kontra un miembro di Parlamento ku ta wòrdu sospecha di a entregá dokumentonan iregular na Parlamento, den e kaso aki tambe ta sumamente urgente i nesesario pa bini transparensia pa Parlamento i komunidat kompletu riba e supuesto disputa ku tabatin entre Parlamento di Kòrsou i Kas di Kòrsou riba fakturanan pagá. No por ta asina ku transparensia i integridat ta konta pa un persona òf partido so i no ta konta pa un persona di un otro partido.

Den e kaso aki ta trata di fondonan públiko ku mester wòrdu responsabilisá i ku ta mustra ku pa años esaki no a sosodé i a wòrdu tapá.

Den e kuadro aki Frakshon di PAR a hasi 12 pregunta na Presidente di Parlamento, dirigí riba haña informashon i klaridat riba e asuntu, pa asina por fiha un posishon kua pasonan ta nesesario pa Parlamento tuma. Ta bisto ku den tur e informashonnan ku ta sirkulá, tin detayenan ku no ta kuadra ku bèrdat i ku mester wòrdu klarifiká.

Ta solamente transparensia di informashon por trese klaridat i kaba ku tur spekulashon pa asina komunidat por tin bista di kiko realmente a sosodé. Nos ta konfia ku Presidente di Parlamento ta duna e echo aki e urgensia nesesario, pa asina Parlamento i komunidat por tin un bista kon a i ta atende ku fondonan públiko.