A saka kara di Kòrsou durante 4daagse di Nijmegen

Nijmegen –  Kòrsou a sobresalí un biaha mas durante e kaminata 4Daagse di Nijmegen. Ku 47 mil partisipante e ta e evento deportivo mas grandi di mundu. Durante e di 107 edishon por a mira bandera di Kòrsou tantu serka partisipantenan komo apoyadonan. Sea pegá na un tas òf un kas òf stènt. Di tur manera a demonstrá amor pa Kòrsou.

Durante e rutanan di 30,40 òf 50 kilometer ta sali for di Nijmegen i pasa diferente pueblitos. Tur sitionan ei por a topa ku bandera di Kòrsou un kaminda. Dos tata tabata kana ku nan yu muhé. Tur kuater tabatin sea e bandera kargá òf komo tísjùrt. Kenneth ku a partisipá ku su yu muhé Lyanne tabata firme. Ta ku karakter fuerte pa perseverá bo tin ku kana i logra kaba e kuater dianan.

E delaster dia Kenneth huntu ku Omar i Naema, un otro tata i yu muhé a kana huntu drenta Nijmegen ku e bandera di Kòrsou. Remarkabel tabata kuantu apoyo nan a haña di mandatarionan i representantenan militar den e tribuna ofisial. Espesial militarnan ku a rekonosé e bandera i a aplaudí fuerte i ku entusiasmo. Esaki por a mira tambe serka algun alkade i wethouders presente.   Lamentabel no ta tin representante ofisial di Kòrsou den tribuna manera antes tempu di Antia.

Rob, un otro tata, a kologá e bandera di Kòrsou na muraya di kas. Esaki pa honrá su yu ku a bini speshal for di Kòrsou pa partisipá. Aña pasa Coco a emigrá. Pero su yu muhé Coco a disidí di partisipá ku un amiga na e 4Daagse i a bini speshal p’eaki un ratu bèk. Pa demonstrá su orguyo ku Coco tei, ela hisa bandera di Kòrsou. Mustra asin’ei ta di unda su yu muhé ta bini aworaki.

Ruth ta un mama ku a entusiasmá su yu muhé Jenaida pa bai e reto di 4daagse kune. Aña pasa Ruth i Jenaida por a trén na Eindhoven kaminda nan ta biba. E aña aki Ruth tabata na Kòrsou i mester a prepará einan. Ela konstantá ku e posibilidatnan pa kana distansia largu ta limitá. Toog ela train basta na koredor. Ruth tambe tabata un embahador di Kòrsou. Aparte su tísjùrt ku e bandera, e ta tin asta un renchi di orea ku diseño di a bandera.

Un persona ku na delaster momento a logra di haña un pèrmit pa kana ta Sonia. Su mishon  tabata hopi spesial. E la guia un señora di edat avansá pa kumpli ku e señora su deseo. E promé dos dia nama bai bon. E di tres dia si e señora a entregá. Ela kuminsá kansa lihé i no tabatin e forsa mas den su pianan. Sonia e orei a sigui kana su so pa terminá e kaminata.

Marvin La Croes tambe ta un dje embahadornan di Kòrsou durante 4Daagse di Nijmegen. Su stènt dorná ku bandera, ta situa net algu promé ku finish. Einan e kanadonan ta keda malkriá ku olgu di kome i bebe. Einan tambe ta reuní pa kana huntu ku bandera di Kòrsou e parti final di e kaminata. Pa mira tur hende ku nan bandera di Kòrsou huntu ta algue impreshonante.

Ta na Wedren, e plenchi sentral a kaminda tur partisipanten ta sali i yega so no por a haña e bandera di Kòrsou mira entre e otronan. Einan tin banderanan kologá di paisnan for di unda tur partisipantenan ta bini. Menos esun di Kòrsou. Esaki paso Kòrsou no ta miembro di Komishon Olímpiko. E organisadónan a bisa ku si Gobièrnu di Kòrsou djis manda un karta splika dikon esaki ta, lo konsiderá pa hisa e bandera di Kòrsou. Ta un desapunto pa hopi kanadó ku ainda nan Kòrsou no ta rekonosé i honrá. Tin kanadó a keda sin partisipá mas pa e motibu ei.

P’esei mes kanadónan ku laso ku Kòrsou a soru bini ku nan mes bandera. Tabata un promoshon grandi pa e Isla. E apoyo ku e partisipantenan a haña a enkurashá nan enorme. P’esei mes mayoria a deklará kaba na final ku no obstante doló di pia, rudia i muskulo, ku otro aña nan tei atrobe.
Reporter Favell Maduro

Dia 1 Vierdaage

Dia 2 Vierdaagse

 

Dia 3 Vierdaagse

 

 

Dia 4 Vierdaagse