KUERPO POLISIAL KÒRSOU 

KOMUNIKADO DI PRENSA

301/2025

22 yüli 2025 

Abeha ta mata kachó i para 

Den oranan di mainta di djamars 22 di yüli 2025, polis a keda dirigí na Katoentuin, kaminda  abeha a pika i mata un kachó i un wakamaya. 

E abehanan aki a traha nan nèshi den un pos ku tabata kompletamente tapá den kurá di un  kas. 

Na Seru Machu i tambe den Stakamahachiweg i Kaya Agrikultura den oranan di mainta a  konstatá nèshinan di abeha den palu ku a kuminsá ataká habitantenan. 

Polisnan di warda di Montaña tabatin kontakto ku un ‘Imker’ i esaki a indiká na nan, ku den  último tres simannan a konstatá ya un kantidat di kuater (4) kaso di atake di abeha fatal  kaminda sea un persona of animalnan domestiko ta pèrdè nan bida. 

Segun e ‘Imker’ no ta trata aki di situashon di abeha normal di abehanan krioyo ku nos  konosé na Kòrsou. 

Ta trata di abehanan ku un agresividat no kustumbrá i tin asta krusamentu di reina òf eksperimentonan ku ta keda hasí pa krea espesienan nobo. 

Humamentu di e abehanan aki no ta kalma nan. 

Mirando loke e eksperto a indiká, Kuerpo Polisial ta atvertí tur persona ku na momentu ku bo  mester nota presensia di abeha den bo besindario, pa bandoná e sitio mesora i yama polis. Si bo ta na kas, drenta paden i hinka bo animalnan domestiko den kas, te na momentu ku e  situashon ta seif pa sali pafó. 

Finalmente e ‘Imker’ a duna di konosé ku en bista ku nos area ta bèrdè, tin sufisiente flor pa e  abeha i no ta spera ku nan lo ta bou di situashon di stress.