Abeha: Un Peliger Potensial, Pero Esensial pa Naturalesa

Abeha: Un Peliger Potensial, Pero Esensial pa Naturalesa

Willemstad – Aunke abeha por parse peligroso pa hende i bestia pa motibu di nan piká, pero nan tin un ròl esensial den nos ekosistema. Últimamente tabatin vários kaso di atake di abeha riba hende i bestia, ku algun di esakinan ku konsekuensia grave i fatal. Esaki a lanta preokupashon den komunidat, spesialmente pa esnan ku ta alérgiko pa piká di abeha.

Sinembargo, ta importante pa komprondé ku abeha ta bira agresivo solamente den sierto kasonan, ora nan nèshi ta sinti peligrá. Na su naturalesa, abeha ta konsentrá riba kolektá nèktar i polen pa produkshon di honing i pa polinisashon di mata.

Abeha: Pilar Fundamental di Polinisashon

Abeha ta fundamental pa polinisashon di flor i frutanan. Sin nan, nos produkshon di kuminda lo bai drástikamente abou. Mas ku 75% di tur polinisashon ta realisá pa abeha. Aunke barbulètè, blenchi i raton di anochi tambe ta kontribuí, e ròl di abeha ta insustituibel. Na pais manera Merka, tin kompania ku ta transportá miónes di abeha na plantashonnan grandi (por ehèmpel apelsina) pa garantisá produkshon di fruta.

Momentu di Peliger: Ora Abeha Ta Defendé Nan Mes

Abeha ta bira agresivo solamente si nan ta sinti un menasá direktamente. Ora bo topa ku un nèshi di abeha:

• No molestiá nan;
• Move for di e sitio i keda leu;
• No trata di mata òf saka abeha for di bo kurpa, pasobra e por lanta un atake mas grandi.

Si bo ta mira abeha ta bula rònt di lus mañan pafó di bo kas, paga tinu—esei por ta indikashon di un nèshi serka.

Rekomendashon pa Persona Ku Ta Laborá Den Area di Riesgo

Personanan ku ta traha den mondi, kas bandoná, òf tereno ku hopi mata, mester tuma medidanan preventivo:

• No uza kolonia, perfume òf after shave – e aromanan por atraé abeha.
• Bishitá e área tempran den dia ora temperatura ta ménos kayente, pasombra e abeha ta ménos aktivo.
• Pone atenshon na presensia di flor – den tempu di áwaseru por tin mas abeha den naturalesa.

Temporada di Abeha

• Den tempu di áwaseru, ta mas komun pa tin abeha lòs pa motibu di reinanan nobo ku ta sali for di nèshi.
• Den tempu di sekura, e kantidat di abeha den naturalesa ta baha.

Ora Bo Mira un Nèshi di Abeha – Kiko Bo Mester Hasi

No trata di saka òf destruí e nèshi bo mes. Tuma kontakto ku un imker eksperto pa yuda den manera sigur.

Kontakto di siguiente Imkernan:

• Ahmed Ayoubi – 560 1513
• Hubert Cordilia – 522 6296
• Gregory Gouverneur – 527 4979
• Lay – 512 3004

Potrèt 1: nèshi ku abeha a traha na dak di un kas.
Potrèt 2: imker ku ta kria abeha.
Potrèt 3: abeha ku ta kolektá nektar.
Potrèt 4: kompania ku ta transportá miones di abeha pa plantashonnan.