E reunion aki tabata den cuadra di colaboracion internacional, specificamente relaciona cu e programa Erasmus+ di Union Europeo, cu ta ofrece fondo pa entre otro, proyectonan innovativo den KIA, particularmente enfocando riba hubentud.

Tur Cos Ta Posibel, cu a formalisa su structura como un Stichting na 2019, ta un organisacion chikito pero comprometi profundamente cu e desaroyo integral di hubentud. Nan ta traha riba tereno di deporte, arte, cultura y inclusion social, y nan mision ta empodera hubentud y organisacionnan local pa logra nan potencial.

Actualmente, TCTP ta activamente presente den Instituto Coreccional KIA atraves di un proyectonan boluntario Europeo (ESC), tanto a largo plaso como den TEAM activities. E proyecto BAM (Barbering, Art & Mechanics), ta dura tres siman y tin como meta pa motiva hobennan deteni entre edad di 21 y 30 aña, den e seccion di hende homber, cu actividadnan recreativo y profesional.

Durante e encuentro, a intercambia pensamento riba e siguiente programanan cu ta alinea cu e vision di Gabinete AVP-Futuro, pero tambe a delibera riba un MOU nobo cu lo kier firma den futuro cercano. Ademas a papia riba participacion di e fundacion TCTP pafo di KIA cu ta sirbi comunidad, principalmente pa e muchanan cu ta vulnerabel pa cay den mal caminda.

Minister Dowers a expresa su aprecio pa e esfuerso di TCTP, particularmente su papel den inspiracion y transformacion den bida di hobennan deteni.

Ministerio di Husticia ta compromete pa sigui busca aliansa strategico cu fundacionnan manera Tur Cos Ta Posibel, cu ta pone den practica e balornan di un segundo oportunidad, educacion alternativo y reintegracion real.