PATH Kòrsou ta para ketu na Dia Mundial Kontra Trafikashon di Hende
PATH Kòrsou ta para ketu na Dia Mundial Kontra Trafikashon di Hende
Willemstad, 30 di yüli 2025 – Awe, riba Dia Mundial Kontra Trafikashon di Hende, PATH ta para ketu i afirmá su kompromiso pa lucha kontra trato i eksplotashon di hende. E Dia Mundial aki, riba 30 di yüli, ta sirbi komo un momentu pa trese atenshon na e víktimanan, oumentá konsientisashon, i mustra ku e lucha no por wòrdu laga na banda.
PATH, ku su abreviashon ta: Prevenshon di Abusu i Trafikashon di Hende, ta un unidat/organisashon di Ministerio di Hustisia dediká na prevenshon, edukashon, protekshon di víktimanan i koperashon entre instansianan enbolbí na Kòrsou. E forma pa enfrentá trafikashon di hende ta eksigí atenshon serio, maneho stratégiko i un enfoke humano.
Na e okashon akí, PATH ta lansa un yamada nobo pa reforsá kolaborashon den komunidat:
- Si bo ta mira algu ku bo no ta sinti bon di dje, bisa algu.
- Si bo ta sinti ku un persona ta den peliger, buska yudansa.
- Si bo ke sa mas tokante abusu òf trafikashon di hende i kiko por hasi, bishitá www.path.cw.
Ministerio di Hustisia, den kolaborashon ku partnernan lokal primordial (Ministerio Públiko, KPC, Wardakosta, Ministerio di SOAW) i internashonal, ta sigui traha huntu ku PATH pa fortalesé investigashon, protekshon di víktimanan, i edukashon públiko. Den kolaborashon ku Curaçao Ports Authority (CPA) i Curaçao Airport Partners (CAP), pa konmemorá e dia aki, e lusnan na Emmabrug i e aeropùerto internashonal di Kòrsou lo ser iluminá den un blou kla.– e símbolo internashonal di e lucha kontra trafikashon di hende, ku ta reflehá solidaridat ku víktimanan i e esfuerso global pa stòp e krímen aki.
Riba e dia akí di refleho i akshon, PATH ta invitá tur hende na Kòrsou pa tuma parti den e lucha. Trato di hende no ta solamente un asuntu legal, pero tambe moral, ku ta eksigí empatia, kompromiso i kooperashon. Bishitá www.path.cw òf yama 692-1990 / 679-7575 pa mas informashon òf asistensia.
639114718427035"
639114718427035"