Gobièrnu ta studiando posibilidat di indeksá duurtetoeslag pa penshonado

Willemstad, ougùstùs 2025

Gobièrnu ta studiando posibilidat di indeksá duurtetoeslag pa penshonado

Den e último dos aña, gobièrnu di Kòrsou a hiba vários kòmbersashon ku representante di penshonado i otro interesadonan tokante e falta di indeksashon di e asina yamá duurtetoeslag. E kuestion akí ta toka spesífikamente un grupo di penshonado di Algemeen Pensioenfonds van Curaçao (APC) ku a baha ku penshun promé ku 1 di yanüari 2016 i ku ta kobra un duurtetoeslag.

Mayoria di e penshonadonan den e grupo akí a traha na un entidat di gobièrnu (òf semi-gubernamental) i nan no a risibí indeksashon di nan penshun den e periodo di 2010-2013. Entre otro debí na inflashon haltu i embehesementu di poblashon, e konsekuensianan di e falta di indeksashon ei ta birando kada bes mas grave. Gobièrnu ta rekonosé ku e asuntu akí no ta solamente un problema finansiero, sino tambe un reto ku ta afektá bienestar sosial di e grupo di penshonado en kuestion.

Ta asina ku un doño di trabou no tin un obligashon legal pa paga indeksashon ku no a tuma lugá i tin vários desishon di hues ku ta konfirmá esaki. No opstante, gobièrnu ta konsiderá ku ta masha importante pa dialogá riba e diferente solushonnan ku por bini kuné pa e situashon akí, i por sierto tin sierto inisiativa ku ta den marcha kaba den e kuadro ei.

Konteksto históriko: introdukshon i desaroyo di duurtetoeslag

Duurtetoeslag a kuminsá na 1939, na momento ku gobièrnu di e tempu ei a disidí di introdusí un pago adishonal komo kompensashon pa e subida di kosto di bida, en bes di un oumento normal di salario. Na 1942, a usa e mesun mekanismo ei pa penshun tambe, i na 1943, “Duurtetoeslagregeling gepensioneerden” a keda introdusí formalmente.

Durante vários dékada, a finansiá duurtetoeslag ku e rekursonan general di gobièrnu. E pago akí a sirbi no solamente pa kompensá inflashon, sino tambe komo un suplemento struktural di e sèn di penshun. Ta te den añanan ’90, ora a stipulá ku e base di penshun ta igual na e kontribuyente su salario real, e atraso struktural akí a keda koregí parsialmente.

Na 1995, tabatin un reforma importante: NV, fundashon i demas instituto di gobièrnu tambe a keda obligá di paga pa e duurtetoeslag di nan èks empleadonan. Pues, e responsabilidat finansiero a bira mas amplio.

Situashon aktual i konsulta

E areglo di duurtetoeslag a keda revoká formalmente dia 1 di yanüari 2016. Esnan enbolbí a keda ku e derechonan ku nan a akumulá i ku derecho riba loke nan tabatin pa kobra na duurtetoeslag te na e momento ei. Nan derechonan ta protehá pa lei. Entrante 1 di yanüari 2016, a modifiká e maneho di indeksashon tambe. For di e momento ei padilanti, indeksashon di penshun ta mará na dos kondishon: indeksashon di salario di empleado públiko i situashon finansiero di pensioenfonds.

Si ámbos kondishon ta kumpli, ta hasi indeksashon di tur penshun i, ademas, ta indeksá e duurtetoeslag di e partisipantenan ku tin duurtetoeslag. E indeksashon di penshun ta wòrdu finansiá ku rekurso di e fondo, anto ta kobra e indeksashon di duurtetoeslag for di e último dunadó di trabou.

For di 1 di yanüari 2016, ta kobra solamente e último dunadó di trabou pa indeksashon di e komponente di duurtetoeslag di e grupo ku tin duurtetoeslag. Na kuminsamentu, e areglo di duurtetoeslag tabata mará na Pensioenverordening Burgerlijke Landsdienaren (PBL), i PBL tabata un areglo di penshun ku no tin un komponente di indeksashon. E grupo di partisipante ku tin un duurtetoeslag a akumulá un penshun bou di PBL pero sin un areglo di indeksashon mará na dje. Atraves di añanan, mediante vários adaptashon hasí na e areglo di penshun, tiki tiki a eliminá e sistema di finansiá indeksashon via e areglo di duurtetoeslag pa e gruponan nobo.

Den práktika, e falta di indeksashon a hiba na un situashon kaminda e penshonadonan ku tin un duurtetoeslag ta haña nan konfrontá ku un redukshon di nan forsa di kompra. Na mes momento ta asina ku e entidatnan kompetente i APC ta mará na loke lei i regulashon ta stipulá i nan no ta obligá pa kubri e gastunan ei a ménos ku nan risibí outorisashon pa esei di antemano.

A papia riba e realidat kompliká akí durante e konsultanan ku gobièrnu tabatin ku e representantenan di penshonado. Mester eksplorá e asuntu akí, poniendo den balansa, di un banda, interes di e penshonadonan, i di otro banda, loke ta faktibel finansieramente.

Loke ta den wega: e retonan di un komunidat ku ta embehesé

Gobièrnu di Kòrsou ta rekonosé aporte di e míles di penshonadonan ku pa hopi dékada a bin ta duna nan kontribushon na sektor públiko. Nos komunidat ta embehesiendo rápidamente. E grupo di penshonado ta birando kada bes mas grandi i kon pa mantené forsa di kompra di e grupo akí ta un tema importante ku ta keda bin padilanti. P’esei mes, ta importante pa dialogá ampliamente riba e reto akí.

Gobièrnu su rekursonan no ta ilimitá i loke e por hasi ta mará na e límitenan fihá den lei. No opstante, gobièrnu ta mirando kiko sí por hasi konforme lei i kiko sí ta faktibel. Pa logra e meta, lo tin mester di solidaridat, pero tambe mente habrí pa dialogá.

Gobièrnu lo sigui sinta ku e representantenan di penshonado i demas partidonan interesá. Na e momento akí, ainda ta muchu trempan pa papia di solushon konkreto, pero echo ta ku e proseso di konsulta ta en marcha i esei mes kaba ta un masha bon señal. Gobièrnu ta enfatisá su boluntat pa sigui ku e proseso akí na un manera transparente i konstruktivo.

Fin di komunikado