Minister Pisas ta laga limpia roi den bario di Montaña pa kombatí molèster di kokolishi 

Minister Pisas ta laga limpia roi den bario di Montaña pa kombatí molèster di kokolishi 

Willemstad – Ministerio di GMN riba indikashon di Minister President Pisas enkarga tambe ku sektor di medio ambiente, resientemente a laga limpia un roi den bario di Montaña pa aliviá habitantenan di molèster di Giant African Land Snail. Esaki a tuma lugá tambe despues ku vários habitante a hasi un keho ofisial na departamentu di THZ. E roi konserní ta tapá ku Bellisima kual ta forma un refugio ideal pa e kokolishi grandi aki. E kantidat grandi di flornan di e mata tabata atraé tambe bastante abeha. Ku limpiesa di e roi aki Minister Pisas a aliviá habitantenan di e plaga di kokolishi i a eliminá posibel menasa di abeha.

Giant African Land Snail ta e kokolishi gandi ku ya pa basta aña kaba ta presente den nos medio ambiente. Den kaso di e bario na Montaña aki e kokolishinan tin refugio bou di e tapeit di Bellisima i momentu ku awaseru kai nan ta sali i kuminsá subi muraya di kurá i di kasnan. Habitantenan mes a eliminá bastante kokolishi den nan afan pa kombatí nan pero esaki no a duna muchu resultado. Despues di a hasi keho ofisial na THZ, Minister Pisas a duna instrukshon pa hasi e trabounan di limpiesa kual a tuma lugá algun dia despues.