Tur mucha tin mesun chèns pa logra den enseñansa na Kòrsou?

 

Tur mucha tin mesun chèns pa logra den enseñansa na Kòrsou?

Yanüari 2025 SEO Economisch Onderzoek a entregá na Minister di Enseñansa un rapòrt ku ta kontené resultado di nan investigashon riba igualdat di oportunidat den enseñansa na Kòrsou. 

Algun di e resultadonan remarkabel di e investigashon aki ta:

• Tin diferensia di kalidat notabel entre skolnan di fundeshi; 
• Ta eksistí eskoho selektivo di alumno na skolnan di fundeshi (skol ta skohe e alumno ku é ke);
• Falta di dosente ta resultá na diferensia den nivel di skolnan den diferente bario;
• E sistema di finansiá enseñansa ta resultá na diferensia di nivel entre skolnan den diferente bario;
• Sierto skolnan no tin provishonnan basiko adekuá, loke ta afekta e nivel di enseñansa. Esaki ta afektá spesialmente skolnan den barionan mas pober;
• Nos enseñansa no ta enfoká riba e nesesidat di e muchanan di klase sosial abou, loke ta nifiká ku nan ta kai atras.

Edukashon, ta e arma prinsipal pa eliminá e diferensia entre riku i pober, dor di duna e mesun oportunidat di desaroyo na tur mucha. Echo ta ku segun sifranan di CBS, 41.8 % di nos komunidat ta nèt na rant di e liña di pobresa, esta ta di klase sosial abou. Nos sistema di enseñansa, no ta enfoka riba e 41.8% aki nos komunidat, ku ta esnan ku mas mester di dje. Konklushon ta, ku nos enseñansa aña 2025 ta duna mas oportunidat n’esnan riku i ta duna ménos oportunidat na esnan pober pa por desaroyá nan mes. 

Resultado di aña 2025 di skolnan HAVO tambe ta duna un bista kla di desigualdat den enseñansa:

• MIL HAVO: 57%, 
• Radulphus College HAVO: 93.3%,
• VPCO HAVO: 92.6%.

Tin un diferensia di minimo 35% (nivel HAVO) entre e porsentahe di alumno ku a slag na MIL i e dos otro skolnan. E diferensia aki ta demasiado notabel i mester keda spliká. 

E bista aktual di enseñansa na Kòrsou ta preokupante. Mester tuma pasonan práktiko i konkreto pa sera e buraku entre muchanan di famia mas fragil i esnan mas pudiente den nos komunidat na i rondo di skolnan. Si no nos enseñansa, na lugá di krea igualdat i yuda eliminá pobresa den nos pais, ta hustamente krea mas desigualdat i hasi e diferensia entre riku i pober mas grandi den nos komunidat. 

 

Quincy Girigorie

Lider di frakshon di PAR