Sambil ta kla pa sigui ku e kompetensia Sambil pa Kòrsou! 

 

Sambil ta kla pa sigui ku e kompetensia Sambil pa Kòrsou! 

Riba djabièrnè 12 di yüni Minister di Desaroyo Ekonómiko, Sr. Steven Martina huntu ku representante di Ministerio di Desaroyo Ekonómiko (MEO) a risibí un rekorido den e Zona Empresarial na Sambil.   

Na kuminsamentu di e aña aki Sambil a lansa nan kampaña “Sambil pa Kòrsou” ku e meta pa promové, apoyá i stimulá empresarionan lokal i asina duna un aporte fundamental na e prosperidat ekonómiko di nos isla.  

Despues ku mundu kompletu a keda afektá pa e pandemia di Covid-19 i awor ku e periodo di “lock-down” aki na Kòrsou ta tras di lomba, Sambil huntu ku MEO ta kla pa bai kontinuá ku e siguiente fase di e kompetensia “Sambil pa Kòrsou”. Esaki naturalmente lo sosodé teniendo kuenta ku tur e aspektonan di protokòl i higiena stipulá pa Gobièrnu di Kòrsou. 

Awor mas ku nunka nos mester apoyá i stimulá nos empresarionan lokal ya ku esaki lo yuda nos pais pa bolbe para riba pia ekonómikamente. E ganadornan di e kompetensia “Sambil pa Kòrsou” lo risibí un tienda estilo pop-up store pa un tempu definí den  e zona empresarial na Sambil di manera ku nan por promové nan produkto / merkansia i oumentá nan benta riba merkado lokal.

Nos ta pidi pueblo di Kòrsou kompletu i tambe e partisipantenan ku a registrá kaba, pa keda pendiente pa e desaroyonan rondó di e movementu mas grandi di empresarionan lokal tantu mediano komo chikí riba nos isla. 

Pronto nos lo anunsiá e fecha nan ku lo sigui ku e kompetensia i kua lo ta e siguiente fase. 

Sambil huntu ku MEO lo sigui aportá na pueblo di Kòrsou i na mes momento kontribuí na e desaroyo sosial i ekonómiko di nos dushi Kòrsou!  

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: