“Ku btw, Kòrsou por risibi mas sèn na entrada di impuesto.”

“Ku btw, Kòrsou por risibi mas sèn na entrada di impuesto.”
PAR ke kambia e sistema di kobransa di impuesto di Kòrsou drástikamente. E proposishon di PAR ta nifika: eliminá impuesto di salarionan (Loonbelasting) i impuesto di benta (omzetbelasting) i kambia esakinan pa un sistema di kobransa di impuesto riba balor agregá (BTW). E proposishon di PAR ta trata unikamente remplaso di OB i LB pa BTW i no otro impuestonan.
Un sistema di BTW ta mas simpel pa atministrá dor di gobièrnu, e ta mas transparente i komprendibel pa Pueblo i ta hasi ekonomia mas fuerte. E sistema di kobransa di impuesto riba balor agregá (BTW) ta baha gastunan atministrativo pa empresanan drastikamente, e ta hasi kobransa di impuesto mas efisiente i ta drecha kompetividat di Kòrsou internashonalmente.
E análisis di PAR ta basá riba e entradanan di impuesto di ‘Omzetbelasting’ (OB) i ‘Loonbelasting’ (LB) di 2024. E aña ey OB a trese 655 miyon florin i LB a trese 423 miyon florin pa gobièrnu. Huntu bon pa 1.078 miyon florin.
Pa 2025 ta kalkulá un kresementu ekonómiko di 3,2% i un inflashon di 2,5%. Ku esaki e base pa kobra impuesto ta subi ku 5,7% (3,2% kresementu ekonomiko + 2,5% inflashon). Según e kalkulonan un kambio pa BTW por hasta trese mas entrada pa gobièrnu.
A investiga dos senario:
Un senario (1) kaminda ta remplasa OB i LB pa BTW i ta subi tarifinan proporshonalmente. Pues e tarifanan aktual di OB (0%, 6%, 7%, 9%) lo bira 0%, 9,3%, 10,9% i 14%. E kambionan aki lo soru pa un entrada di 1.205 miyon florin na impuesto pa 2025, ku ta 127 miyon florin mas ku 2024 (un aumento di 11,8%).
Un di dos senario (2) kaminda ta remplasa OB i LB pa BTW, pero lagando e tarifanan eksistente di 0%, 6%, 7% i 9%. Dor di un base mas grandi di impuesto i un kobransa mas efisiente, mas sèn den saku serka Pueblo ku kwa e por kumpra mas tantu, pero kontra tarifanan mas abou kompara ku e prome senario, entrada di impuesto pa gobièrnu por subi te na 1.276 miyon florin pa 2025. Esaki ta 198 miyon florin mas ku 2024 (un aumento di 18,4%).
PAR ta enfatisá ku huntu ku introdukshon di BTW, mester tuma medidanan sosial pa protehá e gruponan mas vulnerabel den komunidat. Por pensa riba kompensashon di entrada, subsidio pa alimento i restitushon pa produktonan basiko.
Inovashon digital tambe ta krusial manera: fakturashon digital obligatorio, monitoreo den tempu real i kontròl mas strikto riba kumplimentu. Tambe mester tin un kampaña di komunikashon amplio pa informá Pueblo i empresanan.