A alkansá e sifra mágiko di 3000 kachó sterelisá
A alkansá e sifra mágiko di 3000 kachó sterelisá
Willemstad – Ministerio di Salubridat, Medio Ambiente i Naturalesa ta partisipá ku orguyo ku nos a logra pasa e límite mágiko di 3000 kachó ku a keda sterelisá. E gran logro aki ta un paso importante den lucha kontra kachonan bandoná i deskuidá i pues asina promové bienestar di animal riba nos isla.
E gran logro aki ta danki na esfuerso di Ministerio di GMN, veterinarionan boluntario, Rescue Paws, Dierenhulp i demas partnernan ku ta parti di e proyekto Bienestar di Animal, ku a logra bai dilanti ku un programa struktural di sterelisashon ku ta redusí e kantidat grandi di kachonan indeseá. E akshon aki ta kontribuí no solamente na un populashon di kachó mas salú, pero tambe na un mihó balansa entre hende i animal den nos komunidat.
Minister di GMN señor Silvania ta hopi orguyoso ku e resultado aki. Pasobra kada kachó ku ta sterelisá ta nifiká ménos chèns pa kachó bandoná riba kaya i mas bienestar pa e kachó mes i pa nos komunidat. E logro aki ta mustra ku nos esfuersonan komun ta ta duna fruta. E mensahe di Minister Silvania ta pa komunidat sigui hasi bon uzo di e oportunidat úniko aki pa sterelisá kachó grátis i asina kontribuí na bienestar di animalnan en general aki na Kòrsou.