Willemstad – Djasabra último a tuma lugá na Hit 100.3 na Kas Grandi, un eksitoso ban topa den kuadro di e proyekto Bienestar di Animal di Ministerio di GMN. Durante e dia ameno aki, habitantenan di Kas Grandi, Montaña i bisindario a haña e oportunidat úniko pa chip nan kachó gratuitamente. Manera semper, tabatin oportunidat tambe pa traha sita pa lagá sterelisá kachó.

A chip un total di 137 kachó i a programá 75 sita pa esterilisashon. E proyekto aki ku kolaborashon di komunidat ta kontribuí na un mihó registrashon i kontròl i ta redusí e kantidat di kachonan bandoná riba kaya. E ban topa a keda realisá danki na e bon koperashon entre Ministerio di GMN, vários organisashon no gubernamental manera; Rescue Paws, Stichting Dierenhulp Curaçao i algun klinika veterinario.

Minister di Salubridat, Medio Ambiente i Naturalesa (GMN) señor Silvania, a bishitá e aktividat pa wak personalmente kon e proseso ta bai i kombersá tambe ku esnan presente. Minister Silvania ta gradisí tur esnan ku a hasi uzo di e oportunidat aki i alabes ta pidi komunidat pa keda pendiente pa mas ban topa ku lo keda organisá proksimamente den diferente bario aki na Kòrsou.