HOBEN PELOTERONAN TA KEDA INVITA PA FORMA PARTI DI DCBA

 

HOBEN PELOTERONAN TA KEDA INVITA PA FORMA PARTI DI DCBA

 

WILLEMSTAD – Dutch Caribbean Baseball Academy (DCBA) ta inisiá otro siklo di entrenamentu pa hóben peloteronan di baseball di Kòrsou i ta invitá tur ku ta interesá pa djòin e programa. DCBA tin 11 aña aktívo kaba ku entrenamentu di nos hóben peloteronan. Un entrenamentu di nivel ku vários coach i kada un eksperto riba nan tereno. 

E training nan ta tuma lugá dos biaha pa siman ku e meta pa e hóben haña èkstra training banda di esun ku e ta risibí serka su propio organisashon. No tin ningun gastu pa por partisipá na e training nan aki. O sea e hóben ta haña un training gratis na un nivel haltu.

Den e 11 añanan di eksistensia di DCBA un gran kantidat di hóben pelotero a pasa den e akademia. Algun a firma i bira profeshonal, otronan a sigui komo studiante/atleta na Merka i Ulanda i otronan a desaroyá i bira un mihó pelotero awe pa nan organisashon aki na Kòrsou mes.    

E kuerpo tékniko di DCBA ta konsistí di Ben Thijssen, ku ta fungi komo kordinadó i coach di e programa i tambe Norval ‘Payo’ Faneyte, Lester Victoria i Hershelon Juliana. Tur e coachnan aki tin un trajektoria largu den baseball lokal i internashonal.

E temporada nobo di entrenamentu lo start diamars benidero 2 di sèptèmber, 2025. DCBA ta train riba tur djamars i djaweps na Tio Daou Balllpark di 5or pa 7or pm. 

Tur pelotero di 12 aña te ku 17 aña di edat ku ta hunga baseball i ta interesá ta bon bini, pa banda di training ku nan propio organisashon, haña trainingnan èkstra i asina desaroyá mas tantu i mas lihé posibel. Si un pelotero of mayor ta desea mas informashon por tuma kontakto ku coach Ben Thijssen na number di telefòn 515-1105 of via e-mail na benthijssen44@hotmail.com.