Preguntanan tokante estado di seguridat kontra kandela di edifisio di Servisio di Impuesto’.

Na: Presidente di Parlamento di Kòrsou
Sr. Fergino H.E. Brownbill
Wilhelminaplein 4
Presente
Willemstad, 12 sèptèmber 2025.
Tópiko: Petishon Ora di Pregunta ( Vragenuur) dirigí na Minister di Hustisia Sr. mr. S. Hato ku e tópiko: ‘Preguntanan tokante estado di seguridat kontra kandela di edifisio di Servisio di Impuesto’.
Honorabel Sr. Brownbill,
Pa medio di e karta aki suskrito ke hasi uso di artíkulo 96A di Reglamentu di Òrdu i ta pidi enkaresidamente pa bo persona por dirigí e karta aki ku e tópiko: ‘Estado di seguridat kontra kandela di edifisio di Servisio di Impuesto‘, na Minister di Hustisia Sr mr. S. Hato.
Alabes ta hasi e petishon na Presidente di Parlamento pa planeá e reunion aki ku Minister di Hustisia mas pronto posibel.
Atentamente,
Quincy Girigorie
Lider di Frakshon di PAR den Parlamento di Kòrsou
Minister di Hustisia
Sr. mr. S. Hato
Wilheminaplein 17
Presente

Kòrsou, 12 sèptèmber 2025.
Tópiko: Estado di Seguridat (kontra kandela), “brandveiligheid” di edifisio di Servisio di Impuesto na Regentesselaan.
Apresiabel Sr. Hato, Resientemente suskrito a tuma nota den Prensa, di e konseho P03-2025, ku Komandante di Brandweer saliente, ing. Tromp MBA, a duna den kuadro di e estado di seguridat di kandela di e edifisio di Servisio di Impuesto Kòrsou na Regentesselaan (“e Edifisio”).
E Konseho ariba menshoná, ta konkluí ku e edifisio no ta kumpli ku un kantidat di eksigensia di seguridat kontra kandela, ta rekomendá un kantidat di adaptashon i ta konseha “met klem” pa no hasi uso di e edifisio, tanten e no kumpli ku algun rekesito krusial.
Suskrito a tuma nota tambe, ku despues di e konseho aki, sr Minister a tuma e desishon pa no alargá e kontrato di trabou ku sr Tromp komo Komandante di Brandweer.
Mas importante pa suskrito sinembargo, t’e pregunta si e edifisio en kuestion ta kumpli ku normanan di Brandweer Curaçao, den kuadro di seguridat kontra kandela, pa asina proteha tantu trahadónan, komo nos komunidat kompletu ku ta bishita e ofisina di Servisio di Impuesto.
Lo ta un situashon sumamente remarkabel, si Gobièrnu di Kòrsou mes no ta tene su mes na su propio reglanan i konsehonan di seguridat di su ekspertonan, siendo ta pidi pa komunidat si tene su mes na e reglanan aki. Lo ta sumamente lamentabel ku Ministernan ta interferí un biaha mas den trabòu di amtenarnan di seguridat i asina pone seguridat di trahadonan i bishitantenan di Servisio di Impuesto na peliger.
Den e kuadro aki, suskrito ta aserka sr Minister ku e siguiente preguntanan:
1. Mirando ku ta trata di un edifisio públiko, suskrito por a risibí un kopia integral di e
konseho di Brandweer Curaçao #P03-2025?
2. Minister por garantisá ku awe, 12 di sèptèmber 2025 e instalashon di mèldu kandela di e Edifisio ta aktualisá i sertifiká konforme reglanan di NEN 2535?
3. Minister por garantisá ku awe, 12 di sèptèmber 2025 e Edifisio tin sufisiente
kompartimentu di kandela òf tin un instalashon di sprinkler instalá?
4. Minister por garantisá ku awe, 12 di sèptèmber 2025 e Edifisio tin sufisiente
“brandslanghaspel” i brandblusser instalá na luganan strategiko i ku tur esakinan ta di
keur?
5. Minister por garantisá ku awe, 12 di sèptèmber 2025 e Edifisio su murayanan di
separashon ta drechá di forma ku nan por kumpli ku e eksigensia di soporta kandela
entre 30/60 minüt?
6. Minister por garantisá ku awe, 12 di sèptèmber 2025 e Edifisio su rutanan di eskape a
wòrdu drechá i adaptá inkluyendo lusnan di emergensia i guia klá?
7. Minister por garantisá ku awe, 12 di sèptèmber 2025 e Edifisio tin un plan di desaloho
“ontruimingsplan” kompletu desaroyá i implementá, konforme reglanan vigente?
8. Minister por konfirma ku riba e fecha di awe, e plan di akshon konforme e konseho di
Brandweer pa mehorashon di e 6 puntonan di atenshon a wòrdu entregá na Brandweer
Curaçao?
9. Minister por garantisá ku awe, 12 di sèptèmber 2025 e Edifisio ta kuadra ku normanan
di seguridat di kandela i ku Minister por garantisa seguridat di tur trahadó i bishitante di
e Edifisio dado kaso ku un kandela mester sende den e Edifisio?
10. Si kontesta riba un òf mas di e preguntanan ariba ta negativo, Minister por splika
suskrito konbini Minister a duna permit pa habri i usa e Edifisio entrante 22 di ougùstùs
2025?
Ta di sumo importansia pa e preguntanan aki wòrdu kontesta a korto plaso, pa garantisá
seguridat di tantu trahadó komo bishitantenan di e edifisio di Servisio di Impuesto i tambe trese klaridat den e ròl di Minister i Gobièrnu den reglanan di seguridat rondó di apertura di e Edifisio.
Gradisiendo di antemano pa e kontestanan risibí mi ta keda,
Atentamente,
Quincy Girigorie
Lider di Frakshon di PAR den Parlamento di Kòrsou