Minister Sithree “Cey” van Heydoorn: Señor Russel Soleana ta e ganadó di e prestigioso Premio Boeli van Leeuwen 2025.

Na aña 2009 a introdusí Premio Boeli van Leeuwen, pa honra e legado di eskritor i hurista prominente aki.

Kada dos aña ta otorgá e premio na un persona ku pa gran parti di su bida a dediká su mes na aktividatnan intelektual òf kultural eksepshonal.

Russel Soleana a demonstrá su pashon, pero tambe dedikashon pa reskatá i mantené un parti esensial di nos herensia afro-kurasoleño,

kual ta Muzik di Zumbi.

Pa kasi 50 aña di su karera artístiko, Russel a krea konsiensia i a popularisá e ritmonan ku ta spiritualmente riku i ku ta forma parti di nos historia, pero tambe ku ta identidat di nos pueblo.

Minister van Heydoorn ta felisitá señor Soleana, ku e rekonosementu aki i ta ekspresá gratitut pa su kontribushon pa preservashon i promoshon di kultura di Kòrsou.