Pa di promé biaha: Kòrsou ta representá na Miss Asia Pacific International na Filipinas

Pa di promé biaha:

Kòrsou ta representá na Miss Asia Pacific International na Filipinas

AMSTERDAM/WILLEMSTAD- Pa di promé biaha, Kòrsou lo tin un representante na e prestigioso sertamen di Miss Asia Pacific International ku lo tuma lugá na Filipinas. Sherrylucia Cristina Morales lo representá nos isla, bou di e organisashon Miss Dutch Caribbean na Hulanda, ku tin Alexandra Atalita na kabes.

Miss Asia Pacific International ta un di e sertamennan mas grandi na Filipinas. E sertamen ta inspirá hende muhé pa sinti nan komfortabel den nan mes kurpa i pa balorá ku individualidat di kada un ta un kalidat fundamental ku ta hasi nan úniko i bunita.

E organisashon ta duna oportunidatnan pa desaroyo pèrsonal, duna hende muhé e chèns pa eksplorá su talento, logra nan potensial mas haltu i bira un ehèmpel di un muhé fuerte, sigur di su mes i empoderá.

E sertamen ta un plataforma kaminda muhé por siña, krese i stimulá kambio positivamente, tantu den nan mes komo den komunidat global.

Sherrylucia ta dediká su kurason pa funshoná komo un bos pa depreshon den adolesente i prevenshon di suisidio. Durante su adolesensia, el a sufri di depreshon i ta tin pensamientu suisidio, pero a buska yudansa profesional na tempu, promé ku hasi algu ku no tabata por kambia.

Su balentia pa enfrentá su traumanan a konvertí dje den e muhé ku e ta awe. Awor, e ta usa su bos pa representá esnan ku ahinda no tin un bos i ta sigui luchando den silensio.

Su meta ta informá i inspirá mayornan, famianan, amigunan i alumnonan di skolnan pa mira mas a leu di e maskarada i wak e pèrsona real. E ke stimulá adolesentenan pa kuminsa papia riba nan eksperiencia ku depreshon i pa buska yudansa, pa kibra e tabú i duna forsa na otro.

Komo representante di Kòrsou riba e podio internashonal, Sherrylucia no solamente lo representá su isla ku orguyo, sino tambe usa su plataforma komo un megafón pa edukashon, inspirashon i speransá, pa ku hóbenan riba mundo sa ku nan no ta so.

E sertamen di Miss Asia Pacific International lo tuma lugá for di 22 di sèptèmber te 10 di òktober, ku e final riba 8 di òktober na Cebu, Filipinas.

E team di Miss Dutch Caribbean ta sumamente orguyoso di Sherrylucia. Aña pasa, ku e inisiativa di Alexandra Atalita, a nase e sertamen Miss Dutch Caribbean. E sertamen aki ta duna damasnan di e islanan Karibense un plataforma pa representá nan paisnan den Miss Universe Netherlands. I awor, e damasnan tambe tin e oportunidad pa representá nan islanan internashonalmente.

Tur klase di eksito pa Sherrylucia.