Directie Natuur & Milieu (DNM) ta sigui cu e serie di podcast aki cu a haya un acogida grandi.

“Cadushi ta Zona cu Dyrick” a ranca sali siman pasa cu e topico Cambio di Clima. El a capta e atencion di hopi durante su prome periodo. E meta di e podcast tawata pa, entre otro, educa e comunidad di Aruba riba su medio ambiente, naturalesa, conservacion di e naturalesa, herencia cultural, salubridad, nan conexion vital, desaroyo sostenibel, y mucho mas.

Diahuebs ultimo, dia 11 di september 2025 a continua cu e episodio number 8 hunto cu invitado Rino Hermans, Director di Crisis Management Operations (ex Bureau Rampenbestrijding – BRA) y Rodney Tromp di Departamento Meteorologico Aruba (METEO) unda a elabora riba e topico “Kico cambio di clima ta nifica pa Aruba?”. E tema di cambio di clima tawata uno sumamente interesante. El a informa e comunidad con ta prepara pa cualkier eventualidad di calamidad inespera. Tambe Hermans a elabora tocante, con lihe un disturbio den atmosfera awendia por transforma y bira un horcan categoria 5 den menos cu 12 ora, pa motibo di e fenomeno di naturalesa actual cu ta e cambio di clima.

E serie “Cadushi ta zona cu Dyrick”, ta presenta door di Directie Natuur en Milieu cu e anfitrion presentador dinamico, Dyrick Wouters. Dyrick ta un hoben curioso y pasiona cu Aruba su naturalesa y herencia cultural cu den un forma natural ta combersa cu invitadonan. E programa ta apto pa grandi y chikito. Hunto cu e hoben Dyrick, bo ta explora Aruba su biodiversidad, tradicion, esfuerso pa conservacion y e retonan ambiental door di entrevista cu e invitadonan y uzo di imagennan inspirativo.

Asina aki bo tambe ta keda na altura di Aruba su ecosistema unico. Tambe ta siña con pa conserva nos flora y fauna y naturalesa den balans memey di desaroyo, con pa mantene un medio ambiente sano pa practica deporte, con turismo sostenibel ta beneficia Aruba y ta aporta na mantencion di nos identidad cultural, y hopi mas.

DNM ta invita comunidad di Aruba pa busca e serie di podcast pa wak of scucha.

E ta accesibel riba rednan social di DNM como tambe riba e siguiente plataformanan: Youtube, Spotify, Apple Podcast, Facebook y Instagram di DNM. Ta encurasha un y tur pa ‘subscribe’ na e canalnan di DNM riba e diferente plataformanan menciona pa asina no perde niun episodio di “Cadushi ta zona cu Dyrick”. Loke ta fantastico di e podcast ta cu por bay scucha of wak e episodio ora ta conveni bo.

Keda pendiente pa e siguiente episodio cu lo bay den aire otro siman dia 25 di september cu un otro topico interesante pa asina yuda integra naturalesa y medio ambiente den cada un di nos bida diario.