Un Pais mas limpi, ta benefisiá nos tur !
Un Pais mas limpi, ta benefisiá nos tur !
Frakshon di PAR den Parlamento di Kòrsou i miembronan di PAR a uni forsa ku organisashonnan boluntario pa tuma parti den World Clean Up Day Kòrsou 2025.
Den mas ku 200 pais na mundu, grandi i chiki a duna di nan parti pa mustra ku nos ta kere den un planeta i un Kòrsou mas limpi.
E djasabra aki a demostrá kla ku kada akshon ta konta. Kada un parti di Kòrsou ku a keda limpiá, kada un bòter di plèstik ku a keda rekohé, ta un kontribushon na un isla ku nos tur ta stimá i ku nos tur ke laga komo herensia pa e siguiente generashonnan.
Komo frakshon nos lo kier yama Danki na e organisádonan di World Clean Up Day Kòrsou, ku a logra mobilisá tantu hende, ku hopi pasenshi, energia i amor. Tambe na tur boluntario, un danki grandi, nos a sa di traha huntu, na bienestar di nos isla.
Kòrsou ta meresé un futuro sostenibel i mas limpi. Frakshon di PAR ta komprometé pa sigui traha den Parlamento riba lei i maneho ku ta protehá nos medio ambiente i bienestar general.
Pa esaki nos ta hasi un yamada na Gobièrnu pa públika e lei di plèstik ku Parlamento den su totalidat a aprobá. Ademas fortifiká kontròl di vehikulonan ku ta transportá sushi sin tapa esakinan.
Finalmente un Kòrsou mas limpi ta benefisiá nos tur. Abo, Ami i nos siguiente generashon !!
