WoMen’s Steering Committee a organisá charla tokante Salú Mental ku oradó Dr. Yves Schoop

WoMen’s Steering Committee a organisá charla tokante Salú Mental ku oradó Dr. Yves Schoop

WILLEMSTAD – Den kuadro di un seri di seshon informativo planiá pa 2025, WoMen’s Steering Committee Curaçao (WSCC) a organisá un charla tokante Salú Mental. Orador invitá pa informá i elaborá riba e tema tabata Dr. Yves (Payo) Schoop.  E enkuentro a tuma lugá na e sentro di WSCC na Santa Rosaweg. 

“Salú Mental ta un aspekto ku mas i mas ta afektando nos komunidat i ta un tema ku nos mester ta bon informá di dje, i hasié un tema mas habrí pa diskutí tokante di dje den tur gremio,” Sra. Mirieta Lourens – de Lanoy, president di WSCC a bisa. 

Dr. Schoop a informá entre otro tokante diferente forma di salú mental, kiko por hasi pa prevení ku defisiensia di salú mental por afektá un persona, su famia i su alrededor. Alabes Dr. Schoop a informá kon por detektá diferente formanan di defisiensia di salú mental, i kon pa atendé ku esaki una bes ku a detektá esaki.

Tabata un seshon interaktivo durante kua esnan presente a partisipá hopi aktivo. “Nos ta hopi agradesí na tur esnan ku a akudí na e charla i tambe sin mas na Dr. Schoop pa e informashon ku el a komparti. Den mes rosea nos ke invitá pa sigui nos informashon via media tradishonal i plataformanan di media sosial, pa keda al tanto di e siguiente aktividatnan ku WSCC lo organisá,” sra. Lourens – de Lanoy a klousurá bisando.