KIKO i e Man ta bai selebrá su aña na Novèmber próksimo: Kòrsou ta fortifiká protekshon di mucha kontra abusu seksual

 

KIKO i e Man ta bai selebrá su aña na Novèmber próksimo:

Kòrsou ta fortifiká protekshon di mucha kontra abusu seksual

Willemstad – KIKO i e man ta e kampaña ku Ministerio di Hustisia a lansa for di aña pasa na Novèmber 2024, kual ta un kampaña kontra abusu seksual di mucha. Kiko i e Man lo bai selebrá su aña na 18 di novèmber próksimo. Ounke e Tratado di Lanzarote pa Kòrsou no a drenta na vigor formalmente ainda, Gobièrnu ta enfatisá ku protekshon di mucha no por dependé di formalidat legal. P’esei den kuadro di e tema di abusu seksual kontra mucha aki, Gobièrnu di Kòrsou ya a kuminsá ku diferente implementashon. Aktualmente nos pais Kòrsou falta un solo kondishon formal pa por pasa ku ratifikashon, i no opstante di esaki, Gobièrnu a komprometé su mes pa demostrá ku e tin importansia tur dia di nobo pa protekshon di mucha.

Kiko ta Tratado di Lanzarote? Tratado di Lanzarote ta un akuerdo internashonal di Konseho di Oropa pa protehá mucha kontra eksplotashon seksual i abusu seksual. E tratado a wòrdu firma na islanan Lanzarote (Spaña) na aña 2007. E ta e promé tratado internashonal ku ta deklará ilegal tur forma di abusu seksual di mucha, inkluí abusu den kas o den famia.

Asina mes, hopi obligashon importante di e tratado ta den funshon kaba aktualmente. Kòrsou a invertí den informashon i konsientisashon pa mucha, mayornan i profeshonalnan (artíkulo 6), ta garantisá formashon i treinen pa profeshonalnan ku ta traha ku mucha (artíkulo 7), ta fortifiká e posishon di mucha dor di informá nan aktivamente tokante nan derecho (artíkulo 8), i ta stimulá kolaborashon ku organisashonnan sosial i otro aktornan (artíkulo 10). Ademas, ta hasi abusu seksual den medio serká di mucha kastigabel (artíkulo 18), kual ta duna garantia i tambe opshon i pa persekushon (artíkulo 20), i ta duna asistensia na víktima (artíkulo 29).

Úniko paso formal ku falta pa ratifikashon ta e aksesibilidat di un databank nashonal di DNA (artíkulo 37). E trayekto aki ta den un estado basta avansá i Minister di Hustisia ta konta ku na korto plaso lo kumpli ku e último kondishon, pa e tratado por drenta na vigor pa Kòrsou. E databank di DNA tin un balor grandi: e ta permití ku servisio di polis òf kualke outoridat kompetente por identifiká e outor rápido, prevení ripitishon, i liberá inosentenan. E instrumento aki ta forma un pilar esensial den protekshon struktural di mucha kontra abusu seksual.

Den preparashon pa selebrashon di e promé lustro di KIKO i e Man dia 18 di novèmber próksimo, vários aktividat lo kuminsá pa sigui hasi komunidat mas konsiente i involukrá nan den e lucha kontra abusu seksual di mucha. Informashon adishonal tokante e aktividatnan aki lo wòrdu kompartí pronto.

Minister di Hustisia ta enfatisá ku e dedikashon aki tin un sosten amplio den Gobièrnu i den organisashonnan sosial. Importante ta, pa por risibí e sosten kompletu di nos komunidat pa un tópiko asina importante. Protekshon di mucha no ta un asuntu di polítika, ni tampoko algu di un parti di nos komunidat so, sino un tarea ku komo komunidat nos tin ku traha konhuntamente pa para abusu i garantisá un ambiente sigur pa nos mucha.

“Nos no por ni kier warda te ku tur formalidat pa ratifikashon ta kla. Protekshon di nos mucha tin e prioridat mas haltu. E ta un responsabilidat komun pa para abusu, i esei mester kuminsá awor,” segun Minister di Hustisia.