Selebrashon promé aniversario di Lokèt di Komunidat

Willemstad – Lokèt di Komunidat situá na Sambil a selebrá djabièrnè, 2 di òktober 2025, su promé aniversario. Den esfera ameno i di alegría invitadonan i koleganan a festehá e momento di logro aki.

Lokèt di Pèrmit i Asuntunan Públiko (Kranshi) di e Ministerio di Maneho di Gobernashon, Planifikashon i Servisio Públiko (BPD) a selebrá e promé aña di eksistensia di Lokèt di Komunidat. Minister Kimberly Lew-Jen-Tai ta sumamente orguyoso di e logro aki. E minister a ekspresá su gratitut na empleadonan i muy en partikular na hefe di servisio sra. Shumire Johannes pa e trabounan realisá. E establesimentu aki a demostrá su motibu di eksistensia. A inisiá ku un selekshon di produktonan i servisio ku Kranshi i Lokèt di Pèrmit ta brinda. Awor klientenan por risibí esakinan na Lokèt di Komunidat bou di 1 dak. E lema ‘Servisio di Kalidat, na 1 Lokalidat’ tei i ta bai keda pa basta aña mas.  Lokèt di Komunidat awor ta anunsiá ku lo sigui brinda e servisio manera kustumbrá aki i pronto nos lo ampliá e kantidat di produkto i servisio ku ta ofresé. Esaki den e kuadro di servisio aksesibel i efisiente pa su klientenan di Kòrsou.

Danki na tur empleado i Pueblo di Kòrsou pa e aseptashon, apoyo i konfiansa. Nos ta spera di por sigui konta ku pueblo di Kòrsou.

Lokèt di Komunidat ta situá na Sambil (entrada Cas Abou)
Orario: djaluna pa djaweps di 09:00 – 16:00 or di atardi i djabièrnè 09:00 – 12:00 or di mèrdia.