PNP TA EKSIGÍ DISPENSASHON INMEDIATO PA LANDSONTVANGER

PNP TA EKSIGÍ DISPENSASHON INMEDIATO PA LANDSONTVANGER

WILLEMSTAD, CURAÇAO — Frakshon di Partido Nashonal di Pueblo (PNP) ta reakshoná ku indignashon i preokupashon profundo riba e situashon inakseptabel ku a
surgi rondó di e Hefe di Landsontvanger, sr. Alfonso Trona. E yamada públiko di sr. Trona pa dispensashon di su obligashon di sekresia ta surpasá un asuntu personal; e ta
un prueba kla di un krísis di gobernashon i transparensia.

Hefe di Landsontvanger a duna di konosé ku e ta kla pa klarifiká e echonan kompletu, respaldá pa dokumentashon, pero pa motibunan legal spesífikamente Artíkulo 50 di e
Algemene Landsverordening Landsbelastingen (ALL) e tin ku kumpli kuné.
Nos frakshon ta reitera pa ku esaki tambe e artíkulonan di Landsverordening Materieel Ambtenarenrecht Artíkulo 61 i 62, tambe Artíkulo 200 di Wetboek van Strafvordering.

E obligashon di sekresia akí, ku mester protehá e organisashon, awor ta keda malusá pa un Gobièrnu bou di un partido mayoritario ku ke skonde e berdat pa pueblo.

E esfuerso públiko ku e Minister di Finansa ta hasi pa krea un otro narativa den e asuntu akí, ta solamente ta fortalesé e sospecho ku e Gabinete aktual ta hasiendo tur
kos posibel pa blòkia aklarashon kompletu di e kaso.

Hefe di Landsontvanger, sr. Trona ta enfatisá ku tur su akshonnan operashonal, desishonnan atministrativo i instrukshonnan risibí, inkluso esnan duná na Landsontvanger i/òf konsùltantnan, a keda kompletamente dokumentá. Aki ta trata di e integridat di ámtenarnan i e funshonamentu ku finansa públiko, impuesto di pais i
Landsontvanger den e último añanan. E preshon i e atakenan eksperensiá for di e maneho aktual kargá pa un partido mayoritario ta un atake direkto riba e pilarnan di
nos estado di derecho.

Frakshon di PNP a manda un karta via di Presidente di Parlamento pa Konseho di Minister i Gobernador pa eksigí lo siguiente:

1. Otorgá Landsontvanger sr. Alfonso Trona e dispensashon formalmente i legalmente nesesario awe mes.

2. Permití sr. Trona pa presentá tur dokumentashon i prueba na Parlamento i instansianan kompetente pa asina e pueblo por haña e bèrdat kompletu.

3. Kualke forma di stroba òf nenga e dispensashon akí lo keda mira komo un konfirmashon ku e Minister i e partido mayoritario ta enkargá ku e blokeo di transparensia.

Pueblo di Kòrsou meresé un finansa públiko ku ta funshoná na un manera
íntegro i transparente, i no un Landsontvanger ku ta biba den un ambiente di
miedu i tirania.