Ministerio di Hustisia ta fortifiká e maneho kontra  violensia doméstiko i relashonal 

 

 

 

Ministerio di Hustisia ta fortifiká e maneho kontra  violensia doméstiko i relashonal 

Willemstad – Ministerio di Hustisia, huntu ku Kuerpo Polisial Kòrsou (KPC) i diferente  partner, ta traha di forma intensivo pa fortifiká e protekshon di muhé i muchanan kontra  violensia doméstiko i relashonal. Despues di e insidente hopi lamentabel di wikènt ultimo, a  prepará medidanan konkreto pa mehorá e maneho di e situashon, ku énfasis riba prevenshon,  protekshon i kooperashon. 

Minister di Hustisia, mr.. Shalten Hato, a enfatisá ku protekshon di hende muhé i mucha  muhé ta un prioridat den e polítika di hustisia: 

“Kada kaso di violensia kontra hende muhé òf mucha muhé ta un di mas. Nos mester aktua  hopi mas trempan promé ku esaki ta demasiado lat. Esaki ta pidi no solamente determinashon  di nos Gobièrnu, sino tambe e kompromiso di henter komunidat.” 

Inisiativa pa lanta Tim Rèspèt i Protekshon (TRP) 

Un di e medidanan prinsipal ta e formashon di Tim Rèspèt i Protekshon (TRP) — un team  spesialisá den polis ku ta enfoká riba kaso di violensia doméstiko, violensia entre pareha i  femisidio. 

E tim di TRP aki lo traha bou di e prinsipio “protekshon promé ku ta demasiado lat” i ta  enfoká riba un investigashon rápido i empátiko pa víktima, kooperashon muchu mas serka ku  partnernan ku por duna servisio di yudansa i uzo di sistema moderno pa registrashon i  notifikashon di kaso. 

Nota: E nòmber “Tim Rèspèt i Protekshon (TRP)” ta aktualmente un nòmber di trabou. E  nòmber definitivo òf ofishal por wòrdu determiná posteriormente. 

Entrenamentu i profeshonalisashon 

Den KPC lo kontinuá ku invershonnan den entrenamentu i profeshonalisashon. E intenshon ta  pa agentenan polisial risibí formashon riba maneho sensitivo na género i protekshon di  víktima. Ademas, ta desaroyá guia mas detayá pa mehorá e siguimentu i tratamentu di kualke  notifikashon di violensia.

Kooperashon i prevenshon 

E strategia no ta limitá su mes na represhon, sino tambe na e parti di prevenshon. E ministerio  lo bai traha huntu ku skolnan, organisashonnan, komunidat i sosionan sivil pa oumentá konsenshi i kibra patronchi di abusu den relashonnan kual tin violensia aden. Tambe ta eksistí kolaborashon ku organisashon internashonal manera UN Women i GREVIO di Konseho di  Europa pa kompartí eksperensia i risibí sosten. 

Mónitòr i kolekshon di dato 

Finalmente, lo traha riba entre otro un sistema pa fortifiká i monitoria pero tambe pa por yega  na kolekshon di data. Ku un registrashon i análisis mas bon di insidentenan di violensia, lo  por rekonosé e tendensia di violensia muchu mas lihé i ahustá medidanan preventivo na un  manera mas dirigí. E progreso di e strategia aki lo wòrdu reportá kada aña. 

Minister Dato a konkluí: 

“E protekshon di muhé i mucha muhé kontra violensia ta un responsabilidat kompartí – di e  gobièrnu, di e komunidat i di kada un di nos.” 

[FIN DI KOMUNIKADO]