Dos buki nobo den Papiamentu “No ta nan falta” i “Linchi Sardinchi i su hazañanan”

 

 

Dos buki nobo den Papiamentu

“No ta nan falta” i “Linchi Sardinchi i su hazañanan”

 

Willemstad – For di djadumingu 19 di òktober 2025 tin dos buki mas den Papiamentu, idioma natal di e islanan Aruba, Bonaire i Kòrsou. E outor Jenny Coffi-Alberto a publiká e buki “No ta nan falta” i e ilustradó Ashanti Martha a publiká e buki di cartoon (‘stripboek’) “Linchi Sardinchi i su hazañanan”. Tur dos e bukinan tin un konekshon ku e pasado di sklabitut di e islanan. A batisá e dos bukinan den presensia di Madrinanan Judith Martha i Judith Philipa i Padrino Amado Rojer.

E buki “No ta nan falta” ta kontenté poesia den estilo Haiku i den estilo Elfje. Un Haiku ta un poesia ku un skema di 5-7-5 sílaba i un Elfje ta un poesia di 11 palabra. E tema sentral ta eksperensianan di antepasadonan, i e presente i futuro di esnan ku nan antepasadonan tabata esklavisá.

E stripboek ”Linchi Sardinchi i su hazañanan” ta trata mas e impakto di e pasado di sklabitut riba komunidat. Por ehèmpel e Yu’i Kòrsou no ta kustumá di mira su mes ilustrá den stripboek, i manera nan ta bisa: ”Representation Matters”. Linchi Sardinchi ta simbolisá e Yu’i Kòrsou den su totalidat. Lesando i mirando e personahe Linchi Sardinchi den su bida di tur dia, ta mira kon un Yu’i Kòrsou komun i koriente ta biba su bida na su pais Kòrsou. Den su aventuranan por mira su kustumbernan i su kultura. Den su akshonnan ta mira su pasado reflehá. Den e stripboek di Linchi Sardinchi, e Yu’i Kòrsou de pura sepa ta debidamente representá.

Ademas, e buki tin komo meta pa stimulá mucha pa lesa, ya ku e ta brinda kada mucha e oportunidat pa lesa den nan propio idioma, presentá den un forma kómiko i atraktivo.

Fundashon SEDA a pidi i risibí finansiamentu pa publikashon di e dos bukinan aki. Di e forma aki SEDA ta sigui kontribuí na konsientisashon di e tema di pasado di sklabitut.