E estudio ta enfoca riba e status di e asina yama Landen en Gebieden Overzee (LGO’s), y Ultra-Perifere Gebieden (UPG’s ).

Na juni 2024, Tweede Kamer a aproba un mocion di e miembronan White y Paternotte: Gobierno Hulandes ta traha hunto cu islanan BES y Aruba pa realisa un investigacion profundo riba e status di  LGO y  UPG. 

Un team di estudio di University of Curaçao ta analisando e bentaha y desbentahanan cu enfoke huridico, economico y gubernamental pa cada isla y pais riba diferente sector di maneho. Aruba ta representa den e comision di guia pa medio di conseheronan di Ministerio di Relacionnan den Reino. E estudio ta dura te fin di januari 2026. Tin varios rapportnan riba e tema di status UPG y LGO, pero e metodo den e investigacion aki ta mas claro, mas profundo y alabes mas amplio cu e estudionan anterior riba e posicion di e partinan Caribense di Reino Hulandes denter di Union Europeo.  

Cu e investigacion aki, e partidonan envolvi tin como meta pa desaroya un vision bon funda pa futuro di e parti Caribense di Reino Hulandes.