Sea Minister Pisas NO ta komprondé òf e ta pretendé di no komprondé !!

 

Sea Minister Pisas NO ta komprondé òf e ta pretendé di no komprondé !!

Resientemente mi a tuma nota di e komunikado di Prensa, kaminda Minister Pisas ta
pretendé ku Presidente di parlamento tin e òutoridat pa para reunionnan “te previo aviso’, ya ku esaki a sosodé hopi biaha den pasado.
Echo ta, ku ni un momentu so esei NO ta e pregunta ku ta lantando diskushon.
“ E pregunta esensial ta: Presidente di Parlamento tin e òutoridat pa evaluá efektividat
di i para un reunion konvoká a base di un petishon di 3 miembro di Parlamento? ”
A base di art. 64 insiso 1 i 3 di Reglamentu di Orden di Parlamento (“RdO”); Presidente di

Parlamento por yama reunion na dos forma:

1. Riba su propio inisiativa. Esaki ta sosodé por ehèmpel ora ta trata un lei ku yega
Parlamento òf un siudadano òf un Minister pidi un reunion ku Parlamento.
Presidente di Parlamento por yama e reunion aki dia ku e ke i e tin e outoridat pa
evaluá e reunion i su efektividat.

2. Ora 3 miembro di Parlamento pidi un reunion. Den e kaso aki, e reunion ta “DI” e
tres miembronan di Parlamento. Ta nan derechi konstitushonal. Den e kaso ei, a
base di art 64 insiso 3 di RdO, Presidente di Parlamento tin e tarea (no òutoridat) pa
e reunion tuma lugá den 14 dia. E no tin ningun òutoridat pa evaluá e (efektividat) di
e reunion òf di disidí ku e no ta yamé. E mester konvoká e reunion a base di lei.
Punto. Den e diskushon aktual, e reunion NO ta unu yamá riba inisiativa di Presidente di
Parlamento, sino riba inisiativa di 3 miembro, ku ta nan derechi konstitushonal, a base di
art 64 insiso 3 di RdO.

Esaki ta loke sr Brownbill a bisa:
“Mi a evaluá ku sr Silvania a baha komo Minister i komo tal e reunion no por logra e meta pa kua el a wòrdu yamá p’e mas”!
E pregunta esensial ta: Presidente di Parlamento tin e òutoridat pa hasi e evaluashon
aki? Nò! Punto! A base di art 64 insiso 1 i 3 di Reglamento di Orden di Parlamento, Presidente di Parlamento no tin e òutoridat pa evaluá efektividat di un reunion pid”I dor di 3 miembro, ni paré. No ta su prerogativo, paso no ta su reunion! Esaki ta ANTI-demokrátiko.

Pregunta nr 2. E òutoridat aki, por wòrdu interpretá, basá riba artikulo 7 di RdO?
Tin hende a pretendé ku e òutoridat aki, apesar ku e no ta pará den lei, por wòrdu derivá for di e lei. Esaki ta bèrdat? E kontesta ta: Nò. Dikon? A base di e prinsipio di legalidat
(legaliteitsbeginsel).
E prinsipio aki ta siñabo, ku tur akshon/òutoridat di un organo, mester ta basá riba lei. Den lei estatal, tur òutoridat ta wòrdu duná den lei, sea pa medio di delegashon, atribushon, òf mandato. Si e òutoridat no ta duná, simplemente e no ta eksistí i ta keda òutoridat di e organo mas haltu. Den e kaso aki, Parlamento kompletu ta e organo mas haltu i e organo ku ta pretendé di tin òutoridat ta Presidente di Parlamento.
P’e motibu ei, art 120 di RdO ta bisa: “Den kasonan kaminda ni e Reglamento aki ni niun otro areglo di lei no ta duna un solushon, un mayoria di miembronan di Parlamento ta disidí”.
Pues den e kaso spesifiko aki, Presidente di Parlamento no tin e òutoridat pa evaluá
efektividat di e reunion, pero si e ke trese esaki na diskushon, e órgano ku tin e desishon
final ta Parlamento. No Presidente. Na promé instansia e evaluashon ta di e “indieners”,
pero si nan no ke para e reunion i Presidente ke diskuti riba e punto, Presidente mester a
habri e reunion, trese su punto dilanti i laga un mayoria di Parlamento disidí. Esaki ta
simplemente lei estatal.
Esaki ta loke sra. Maria Liberia Peters, sr. Frank Hanze, sra. Suzy Camelia Römer i por
último mi persona tin simannan splikando a base di lei. Echos. Simpel.
Quincy Girigorie
Lider di Frakshon di PAR