Prome Minister Evelyn Wever-Croes: GOBIERNO DI ARUBA TA ORGUYOSO CU 35 PERSONA A WORDO CONDECORA

Prome Minister Evelyn Wever-Croes:

GOBIERNO DI ARUBA TA ORGUYOSO CU 35 PERSONA A WORDO CONDECORA

Como un costumber caba, cada aña na ocacion di celebracion di Aña di Rey, Comision Condecoracion Real Aruba a organisa e evento na unda ciudadanonan cu a destaca den comunidad a bin na remarke pa ricibi un Condecoracion Real.

Gobierno di Aruba no tin ningun rol den e decision pa Condecoracion Real. E unico cos cu Gobierno a haci ta organisa un campaña di informacion activo pa encurasha nos comunidad entrega mas proposicionnan compara cu añanan anterior.

Tur esnan cu a wordo proponi, a wordo manda pa e comision na Hulanda. Y Hulanda a dicidi cua persona ta bin na remarke. Ningun gobernante a propone un persona pa haya condecoracion. E proposicionnan a bin di comunidad di Aruba. Pa un persona yega na consideracion pa bin na remarke pa wordo condecora, e mester a brinda prestacionnan particular den y pa nos comunidad riba tereno boluntario cu ta di balor den desaroyo di Aruba. Un persona asina, ta wordo reconoci pa e comunidad cu ta di opinion cu e persona merece e honor aki pa tur locual e ta haci pa y den nos comunidad a base boluntario. E proposicionnan aki pa Condecoracionnan Real ta wordo trata na Hulanda door di e organo cu ta carga e nomber di “Nederlandse Kapittel voor de Civiele Orden”.

Gobierno di Aruba ta sumamente orguyoso cu e comision di Decoracion Hulandes a honra 35 proposicion di ciudadanonan Arubiano. Ta prome biaha den historia di Aruba y di paisnan di Reino den Caribe, cu un grupo asina grandi di condecoracion ta wordo otorga.

Gobierno di Aruba ta sumamente orguyoso di e cobertura positivo cu e cantidad record di condecoracion a haya internacionalmente.

“Mi ta convenci cu tin hopi hende mas na Aruba cu merece un condecoracion. Tin hopi hende na Aruba cu ta traha boluntariamente pa yuda otronan, pa hopi aña, sin pidi nada a cambio. Esaki ta locual Rey Willem Alexander kier reconoce cu e condecoracionnan aki.

Gobierno di Aruba mes no por haci proposicion, pero lo sigui informa y entusiasma comunidad pa haci proposicionnan den futuro. Pa Condecoracion Real 2020 e campaña di informacion lo cuminsa memey di e aña aki”, Prome Minister Evelyn Wever-Croes a duna di conoce.

Prome Minister ta felicita di curason tur e condecoradonan di e aña aki y ta gradici cada un pa e trabounan boluntario cu nan ta haci pa y den nos comunicad.

“Ohala cu e condecoracionnan aki por stimula mas trabou boluntario den nos comunidad”, Prome Minister a expresa.

Condecoracion Real1

Condecoracion Real3

Condecoracion Real5

Condecoracion Real7

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: