Delegashon di komishon di Tráfiko, Transporte i Planifikashon Urbano a keda risibí pa SENA
Djamars, 28 di òktober 2025, e delegashon di komishon di Tráfiko, Transporte i Planifikashon Urbano a keda risibí pa SENA, den persona di e direktor di ‘Promoción y Relaciones’ Corporativas, sr. David Garzón García, i su tim. SENA ta un entidat 100% públiko ku tin e tarea prinsipal di formashon di siudadanonan Kolombiano. Formashon den diferente área, manera finansiero, tékniko, desaroyo sosial i infrastruktura. SENA tabata involukrá ku e programa di “Mi Casa Ya”, pa loke ta trata formashon di personanan pa drenta den e sektor laboral di konstrukshon i forma personanan riba área sosial. E delegashon a haña un bista general di e trabounan i a palabrá ku lo sòru pa un grupo di trabou ku personanan ku a traha spesífikamente ku e programa di “Mi Casa Ya” reuní ku e delegashon. Di e manera aki por bai den profundidat di detayenan ku SENA a topa durante e proyekto di “Mi Casa Ya”.
Mas despues e delegashon a haña un presentashon ekstenso di e eks Minister di Bibienda, sr. Luis Felipe Henao, kende ta e arkitekto di e programa “Mi Casa Ya”. Luis Felipe Henao a elaborá riba diferente ángulo di e maneho di bibienda aki. E la splika entre otro ku un di e metanan primordial tabata ku mester a hasi aksesibel pa tur persona, inkluso esun ku ta kobra salario mínimo, por yega na un dak propio riba nan kabes. Tambe e la mustra e importansia pa hasi e maneho di bibienda unu nashonal, pa tur hende karga esaki. Asina a sigui duna ehèmpelnan di aspektonan ku no a kana bon i kon a ahustá na kaminda. Kòrsou lo mester diseñá su propio maneho di bibienda a base di análisis di dato ku ta ilustrá e realidat di no mes pais.
