𝗠𝗶𝗻𝗶𝘀𝘁𝗲𝗿 𝗱𝗶 𝗛𝘂𝘀𝘁𝗶𝘀𝗶𝗮 𝗱𝗶 𝗯𝗶𝘀𝗵𝗶𝘁𝗮 𝗻𝗮 𝗖𝘂𝗿𝗮ç𝗮𝗼 𝗚𝗮𝗺𝗶𝗻𝗴 𝗔𝘂𝘁𝗵𝗼𝗿𝗶𝘁𝘆

𝗠𝗶𝗻𝗶𝘀𝘁𝗲𝗿 𝗱𝗶 𝗛𝘂𝘀𝘁𝗶𝘀𝗶𝗮 𝗱𝗶 𝗯𝗶𝘀𝗵𝗶𝘁𝗮 𝗻𝗮 𝗖𝘂𝗿𝗮ç𝗮𝗼 𝗚𝗮𝗺𝗶𝗻𝗴 𝗔𝘂𝘁𝗵𝗼𝗿𝗶𝘁𝘆

Willemstad, 30 di òktober 2025 — Curaçao Gaming Authority (CGA) a risibí awe Minister di Hustisia, señor Shalten Hato, pa un bishita di sera konosí na su ofisina nobo na Scharlooweg. E bishita aki a tuma lugá den kuadro di e repartishon di kartera den e gabinete aktual ku resientemente a tuma lugá, den kual CGA ta kai bou di responsabilidat polítiko di Minister di Hustisia.

Durante e bishita, Minister i su delegashon a sera konosí ku e direktornan di CGA i a keda informá di aktualidatnan di e organisashon. Durante di e bishita a deliberá riba diferente tópiko manera implementashon di e “Landsverordening op de Kansspelen” (LOK), proseso di transishon di CGA, nombramentu di miembronan nobo pa Hunta di Komisario (RvC), i kolaborashon entre CGA i Minister di Hustisia.

Durante e enkuentro ku direktornan di CGA a keda konfirmá ku implementashon di e reforma di akuerdo ku e Ordenansa Nashonal riba Wega di Plaka (LOK), lo sigui sin interupshon bou di e Ministerio di Hustisia. Aktividatnan di lisensia i supervishon lo sigui manera kustumber. Tambe a papia ku e proseso pa nombra komisarionan nobo a kuminsá kaba i lo keda kompletá dor di Minister mas pronto ku ta posibel.

E bishita a konkluí ku un rekorido kòrtiku pa sera konosí ku e edifisio nobo di CGA na Scharlooweg 172-174, ku ta fungí komo kantor for di mart 2025.

CGA ta apresiá envolvimentu i diálogo habrí ku e Minister i ta spera riba koperashon konstruktivo na interes di un supervishon fuerte pa fortalesé un sektor di wega di hazar transparante i konfiabel na Kòrsou.