Pa un sektor mas resiliente, CBCS ta presentá informe Financial Sector Strategic Review
Pa un sektor mas resiliente
CBCS ta presentá informe Financial Sector Strategic Review
WILLEMSTAD/PHILIPSBURG — Siman pasá, durante un simposio organisá na Sint Maarten i Kòrsou, Centrale Bank van Curaçao en Sint Maarten (CBCS) i Nyenrode Business University a presentá e informe di e proyekto Financial Sector Strategic Review (FSSR). E inisiativa importante akí tin e meta di hasi sektor finansiero di nos union monetario mas resiliente, adaptabel i sostenibel.
E simposio a tuma lugá dia 21 di òktober na Sint Maarten i dia 24 di òktober na Kòrsou, i a konta ku presensia di vários stakeholder importante di gobièrnu, sektor finansiero, mundu akadémiko i sektor privá. Profesor Dr. André Nijhof di Nyenrode Business University a presentá e resultadonan prinsipal di e investigashon independiente akí ku a kombiná análisis di dato, entrevista ku stakeholder i un estudio ku a kompará sektor finansiero den diferente teritorio di nos region.
Un sektor finansiero ku ta funshoná debidamente i ku ta bon prepará pa e retonan di futuro ta esensial pa kresementu ekonómiko i outosufisiensia di un pais. Sektor finansiero ta un pilá di ekonomia den e union monetario di Kòrsou i Sint Maarten. I segun ku e sektor akí ta enfrentá mas i mas reto i oportunidat nobo debí na digitalisashon, riesgo di siguridat sibernétiko, inteligensia artifisial, kambio riba tereno regulatorio i internashonalisashon, adaptashon di strategia ta un nesesidat. Si nos sektor finansiero logra posishoná su mes stratégikamente, e lo por saka máksimo probecho di e kambio- i oportunidatnan ku presentá.
Na inisio di e proyekto FSSR, a tene un konferensia inougural na òktober 2024. E proyekto di investigashon a identifiká riesgo, kompará kon e otro teritorionan a adaptá nan sektor finansiero i a identifiká e oportunidat- i puntonan fuerte di e sektor lokal, teniendo debido kuenta ku e normanan internashonal, manera inklushon finansiero i transparensia. A base di e resultadonan akí, e informe FSSR ta proponé kuater ruta stratégiko pa prepará sektor finansiero di Kòrsou i Sint Maarten pa por enfrentá e retonan di futuro:
- Business as Usual – Konsentrando riba stabilidat i mehora gradual
- Digital Financial Infrastructure – Ku énfasis riba efisiensia di kosto i resiliensia teknológiko 3. Green Finance & ESG Leadership – Pa promové sostenibilidat i invershon relashoná ku klima
- Regional Wealth & Pension Innovation – Pa promové siguridat finansiero riba plaso largu i kresementu den segmento spesialisá di merkado
E partisipantenan a interkambiá di pensamentu i tabatin un partisipashon animá durante turno liber. Algu ku a bini padilanti ta ku, pa logra berdadero kambio, tin mester di liderazgo i maneho responsabel, un vishon kompartí i kolaborashon aktivo, spesialmente entre sektor públiko i privá. E pènel i e públiko presente tabata di akuerdo ku sektor finansiero t’ei pa sirbi komunidat, tantu
lokal- komo internashonalmente. A reina un konsenso kla: transformashon mester ta riba agènda, pero no por logra transformashon sin kooperashon i sin partisipashon di gobièrnu, den kolaborashon ku sektor privá. Tantu na Sint Maarten komo na Kòrsou, e partisipantenan na e simposio a indiká ku generalmente nan ta preferá un strategia híbrido ku ta kombiná algun elemento di strategia 1 ku algun di strategia 2 òf 3, pa asina prepará Sint Maarten i Kòrsou riba tereno ekonómiko, sosial i finansiero pa e kambionan ku ta na kaminda.
Den poko palabra, e proyekto FSSR ta pidi pa un esfuerso konhunto i liderazgo ku vishon pa futuro, skohiendo un bon ruta stratégiko ku reforma struktural klave, pa krea un sektor finansiero resiliente i kompetitivo riba término largu. CBCS ta pará kla pa duna un man den esaki, den forma di investigashon, dato i tambe fasilitashon.
E informe FSSR ta disponibel riba wèpsait di CBCS na:
https://cdn.centralbank.cw/media/research_by_external/20251027_fssr_eindrapport_2025.pdf.
Willemstad, 31 di òktober 2025
CENTRALE BANK VAN CURAÇAO EN SINT MAARTEN
