Travel Traffic ta informá di konferensia médiko na Sambil ouspisiá pa Salud Sin Fronteras
Travel Traffic ta informá di konferensia médiko na Sambil ouspisiá pa Salud Sin Fronteras
Ku presensia di spesialistanan di Colombia i posibilidat pa sitanan ‘one on one’
WILLEMSTAD – Djaweps atardi a tuma lugá na Sambil un seshon durante kua e agensia di biahe Travel Traffic a duna informashon relashoná ku un konferensia médiko ku lo tuma lugá djasabra awor di 9 pa 11or di mainta na Caribbean Cinemas na Sambil ouspisiá pa e organisashon Salud Sin Fronteras.
Durante e evento informative a hiba palabra Luis Moreno, na nòmber di management di Sambil Shopping Center, Julian Arvelaez, direktor general di Salud Sin Fronteras, Mercedez Williams gerente di travel traffic , i dr. Kenneth van Eer.
Salud Sin Fronteras ta un organisashon ku ta eksistí mas di 20 aña I ta dediká na duna servisio, den e mas amplio sentido di palabra, na personanan di tur parti di mundu ku ta interesá pa hasi chekeo i/òf tratamentu médiko na Colombia. Djasabra mainta 9or di mainta Sr. Arvelaez, kompañá pa un algun spesialista médiko di Colombia, lo duna informashon durante di un kogreso riba diferente servisio ku e organisashon ta brinda na personanan ku ta interesá na hasi un chekeo i/òf tratamentu médiko na Colombia. Sr. Arvelaez a informá alabes ku su organisashon tin ofisina na Medellin, pero ku nan tin un ret di kontakto amplio den e sektor médiko i lo por traha sitanan ku médiko i hòspitalnan na vários siudad grandi na Colombia.
Sra Williams, gerente di e agensia di viahe, Travel traffic di su parti a informá ku su agensia ta e punto di kontakto ku Salud Sin Fronteras, pa personanan interesá pa hasi un chekeo òf tratamentu médiko na Colombia. Den mes rosea sra. Williams a informá ku ya kaba su agensia a prepará paketenan básiko ku ta enserá gastu di biahe, estadia, transporte interno, i opshonal, tournan na Colombia. “Naturalmente semper nos lo skucha e kliente pa asina por ofresé na dje un pakete kòrta na midi di deseo i nesesidat di e kliente,” Sra. Williams a sigui bisa.
Tantu Sra. Williams, komo sr. Arvelaez enfatisá ku ophetivo di e kongreso no ta pa krea kompetensia den área di kuido médiko ku por ofresé na Kòrsou i Colombia. “Nos ke komplementá otro i sin mas ke tin kontakto estrecho ku dòkternan ku ta tratando e kliente na Kòrsou pa asina nos brinda e mihó servisio posibel. Meskos mi por informá ku ora e kliente regresá for di Colombia di un intervenshon, e lo mester sigui ku konsulta i ‘nazorg’ serka su dòkternan na Kòrsou.”
Komo ehèmpel di un kolaborashon entre médikonan di Colombia i Kòrsou tabata presente tambe riba e atardi dr. Kenneth van Eer. E spesialista yu di Kòrsou na su turno a bisa ku el a apresiá e apertura pa kolaborashon ku e tipo di servisio i tratamentu ku su kompania ta ofresé. “Nos mester traha huntu poniendo semper dilanti ku nos ke logra lo mihó pa e kliente pa loke ta trata su salú ku sin mas ta esensial pa bienestar di tur ser humano.
Pa klousurá sra. Williams a informá ku partisipashon na e kongreso i sitanan ‘one on one’ ta gratis pero ku ta masha poko lugá a sobra. “E konseho pues ta pa tuma kontakto ku ofisina di Travel Traffic na 735 – 2387 òf 525 9135 mas lihé posibel, pasobra kuponan ta limitá i yen ta yen.”
