KUERPO POLISIAL KÒRSOU 

 

KOMUNIKADO DI PRENSA

451/2025

26 novèmber 2025 

Alerta pa kiebronan den negoshi 

Kuerpo Polisial ta manda un alerta pa propietarionan di negoshi, relashoná ku  kiebronan of intento di kiebronan ku ta tumando lugá i posiblemente por bai  tuma lugá den fin di aña aki na establesimentunan. 

Algun siman pasá polis a atvertí pa oumento di ladronisia di vehíkulonan di  karga, ku e fin pa usa esakinan pa karga merkansia prosedente di robo. Den sierto kaso ta hasi uso di e vehíkulo di e empresa mes na unda e ladronisia  a tuma lugá, pa transportá e botin. 

Un bia mas ta bai un yamada na tur doño di negoshi, partikularmente esnan ku  ta bende paña, bebida, prenda ets., pa tuma èkstra medida di seguridat na bo  propiedat. 

Sòru pa sufisiente iluminashon, instalá kamara di seguridat i alarma si ainda  esei no ta e kaso. 

Si por, hasi uso di personal di kompanianan di seguridat privá pa sigur den  oranan di anochi i mardugá sea ta pará státiko na bo negoshi òf ta tene  vigilansia ku vehíkulo ku sierto regularidat. 

Evitá te asina leu ku por, den e temporada aki, pa laga vehíkulonan di karga di  un forma ku no ta seif atras, na bo kompania.

SIRBI I PROTEHÁ 

Departamentu di Komunikashon i Prevenshon Página 1 

Polis ta atento mas aun den oranan di mardugá pa moveshonnan sospechoso den besindario di negoshinan, parkenan industrial, sentronan komersial ets. Pero nos tin mester di abo komo komersiante su koperashon den esaki, pa  minimalisá kiebro na bo propiedat.