Korpodeko ta selebrá 40 aña i ta nombra Omar De Souza komo Direktor General nobo

Korpodeko ta selebrá 40 aña i ta nombra Omar De Souza komo Direktor General nobo 

WILLEMSTAD — Ayera nochi 4 di desèmber durante un enkuentro ameno ku partnernan i klientenan, Korpodeko a marká un momentu históriko ku selebrashon di su 40 aña di eksistensia. Diferente orador a hiba palabra pa para ketu na e logronan di Korpodeko ku ta reflehá kuater dékada di kontribushon struktural na desaroyo sosial-ekonómiko di Kòrsou. 

Durante e akto ofisial, a rende homenahe na e legado di e organisashon i na e un empleado leal, kende ta Señora Dionna Maria ku a kumpli 35 aña di servisio dediká. 

Komo momentu sentral durante e selebrashon, Korpodeko a presentá Sr. Omar De Souza komo su Direktor General nobo. Den su palabranan dirigí na públiko, Sr. Omar de Souza a enfatisá ku e ta honrá di por tuma rienda di un organisashon resiliente manera Korpodeko i a konta di su meta pa engrandesé e ròl di Korpodeko komo katalisadó di progreso sosio-ekonómiko sostenibel, inkluso plannan pa den futuro sigui sirbí komunidat i empresarionan di Kòrsou ku mesun kompromiso. Entre otro ela menshoná prioridatnan stratégiko ku ta inkluí ekspanshon di e portofolio di finansiamentu bèrdè ‘Green Loans’, fortifikashon di kolaborashon ku gobièrnu i partnernan, sosten pa empresarionan via treining i kapasitashon, i invershon den desaroyo di talento lokal. 

Tambe Sr. de Souza a duna rekonosemento na Sr. Gerald Statie ku a tuma e liderato interino di Korpodeko pa un temporada i a sòru pa fortalesé e stabilidat finansiero di e institushon na un manera remarkabel. 

E Direktiva a ekspresá konfiansa den e direkshon nobo i a reafirmá ku Korpodeko lo keda un pilá den desaroyo nashonal ku komunidat di Kòrsou i empreasionan por konfia riba dje. 

Korpodeko… Kompolaga!