Tepnan pa prevení ladronisia di outo

KUERPO POLISIAL KÒRSOU
KOMUNIKADO DI PRENSA
471/2025
8 desèmber 2025
Tepnan pa prevení ladronisia di outo
Kuerpo Polisial ke duna aki algun rekomendashon, pa siudadanonan i spesialmente doñonan di vehíkulonan, tuma medidanan apropiá pa evitá mas tantu posibel ladronisia di nan vehíkulo.
⮚ Sòru pa bo tin un lòk di stür of kualke instalashon ku ta difikultá malechornan di bai ku bo vehíkulo;
⮚ Ta rekomendabel pa pone un sistema pa sigui e vehíkulo (GPS) si dado kaso tòg e wòrdu hòrtá;
⮚ Stashoná bo vehíkulo mas tantu posibel na sítionan ku tin sufisiente iluminashon i si tin espasio, den kurá di kas;
⮚ Pone un kandal i kadena fuerte na bo porta di kurá i si por, stashoná e vehíkulo mas serka di bo kas òf un bentana posibel;
⮚ Sigurá bo mes semper ku portanan i bentananan di bo vehíkulo ta bon será;
⮚ No laga e vehíkulo ni pa un ratu kòrtiku bandoná, habrí ku yabi den dje. E malechor por ta mas lihé ku bo;
⮚ Pone un alarma riba bo vehíkulo, di manera ku e ta hala atenshon na momentu ku un persona ta mishi na bo vehíkulo;
⮚ Pone vehíkulonan manera skuter, bròmer ets mas tantu posibel na sítionan unda tin kámara. Pone lòk riba nan manera di wil, stür ets;
⮚ Evitá ku na bo yabi, tin indikashon di bo vehíkulo. Si e malechor hòrta e yabi for di bo, ainda e mester averiguá ta kua vehíkulo e mester bai kuné;
⮚ Na momentu ku bo a bira víktima di ladronisia di vehíkulo, hasi denunsia
inmediatamente na polis. Sòru pa bo sa number di bo vehíkulo i eventualmente kuantu kombustibel tabatin aden.
