𝐎𝐏𝐄𝐑𝐀𝐒𝐇𝐎𝐍 𝐑𝐄𝐅𝐈𝐍𝐄𝐑𝐈𝐀 𝐀 𝐁𝐈𝐑𝐀 𝐔𝐍 𝐑𝐄𝐊𝐌𝐄𝐍𝐓𝐔 𝐃𝐈 𝐊𝐀𝐊𝐈Ñ𝐀.

Partido MAN-PIN a tuma nota den den medionan di komunikashon di informashon ku e kompania ORYX/VIGOR no ta kumpli ku su obligashonnan finansiero relashoná ku operashon di nos refineria.

Segun e publikashonnan e kompania ORYX/VIGOR tin mas ku sinku (5) luna sin paga kontratistanan i trahadónan di e servisio médiko.

MAN-PIN ta komprondé tambe ku a imponé un ultimátum pa ORYX/VIGOR kumplí ku su obligashonnan finansiero promé ku komienso di desèmber 2025.

Ademas, MAN-PIN a haña informashon ku RdK/2Bays a instruí CRU pa suspendé tur servisio ku nan ta duna na ORYX/VIGOR.

A manda un delegashon London ku e meta resolvé i akordá algun punto importante ku tabata stroba un transishon i operashon harmonioso di e fasilidatnan na Emmastad i Bullenbaai, inkluso pago pendiente na 2BAYS, pero te ainda ORYX/VIGOR no a kumpli ku e akuerdo ku partidonan lo a yega na dje.

Awor nos a tuma nota den medionan di komunikashon ku RdK/2Bays a pone beslag riba produktonan di ORYX/VIGOR ku tin den tanki.

Den un programa radial resien, Minister Presidente, Gilmar Pisas, a indiká ku a “tum’é hasi” den e asuntu aki, lokual a krea preokupashon riba e manera ku ta representá pais durante negosashonnan ku a resultá den un kontrato ku ORYX/VIGOR ku durashon di 30 aña.

Di otro banda no tin informashon konkreto ainda riba operashon di e kompania Global Oil ku tin un kontrato pa produsí asfalt.

Den un reunion di Komishon Sentral di Parlamento dia 4 di yüli 2025, gerensia di RdK/2Bays a spliká ku tur kos ta bon i ku den poko tempu operashon di e planta lo kuminsá.

A regla e disputa entre e dos kompanianan pa tur kos por start, pero e realidat di awe ta otro.

Bou di gobernashon di MFK i e aktual gerensia di RdK/2Bays nos a konosé hopi promesa ku te awe a resultá di ta bashí.

Ora gabinete Pisas II a sinta a haña un proseso di negosashon andando ku e konsorsio CORC, pero a kore ku e konsorsio aki i a presentá ku CPR ku a resultá den denunsia pa uso di dokumento falsifiká.

E kaso di posibel aktonan froudulento ta bou di investigashon di Ministerio Públiko bou di e nòmber Iguana.

Despues a bin ku Global Oil pa produkshon di asfalt.

Globbal Oil te awe no a kuminsá i asta stòp pagonan pa falta di kumplimentu di RdK/2Bays.

Despues a firma un kontrato ku ORYX ku despues a kambia nòmber bira VIGOR den kua awe tin disputá entre ORYX/VIGOR ku Global Oil tokante sierto instalashonnan.

A primintí na mas ku un okashon ku ORYX/VIGOR lo tuma tur traha over te awe nada.

Promé ku elekshon a bai para ku miembronan di parlamento di MFK i Minister Presidente pa habri porta di pòst 5 paso operashon di refineria ta bai start.

Pa despues nos ta na realidat di awe ku mesun minister Presidente ta bisa ku ORYX/VIGOR a tum’e hasi.

Mirando ku e desaroyonan aki ta totalmente kontrali na e espektativa positivo ku a presentá, MAN-PIN a hasi petishon pa un reunion públiko ku karakter di urgensia riba e tema “último desaroyo rondó di e kompanianan ORYX/VIGOR i tambe Global Oil relashoná ku operashon di nos refineria”.

Nos a pidi presensia di Minister Presidente na e reunion aki.