ECOEXPO Conference 2025, 12 pa 14 di Desember den Sambil… Un wikent konsiente ku medio ambiente!
ECOEXPO Conference 2025, 12 pa 14 di Desember den Sambil…
Un wikent konsiente ku medio ambiente!
Willemstad.- Kòrsou tur dia ta avansá riba tereno di desaroyo empresarial i industrial ku
vishon riba kambio klimatiko, energía renovabel, resiklahe i konservashon di medio
ambiente. Tin hopi empresa di distribushon di produkto i dunamentu di servisio aktivo den e direkshon aki, sin laga un banda ku tin hopi proyekto innovativo na kaminda ku komunidat no konosé i por lo tantu no ta hasi uso di nan bentaha i fortalesanan, kualnan ta kontribui ku nos medio ambiente i tambe ku nos finansa familiar of komersial.
Riba tereno di konstrukshon ta meskos. Tin ekipo i diseñonan di konstrukshon,
ambientashon klimatiko, horeka, siguridat i hopi mas, ku e siudadano komun no konosé.
Di outo elektriko, no papia mes. Ainda, gran parti di nos komunidat no ta konvensí di e
kumbiniensia of no di “switch” pa un outo elektriko i kiko ta su benefisio. E evento aki lo
ta kombiná ku un outo show kaminda bo por probecha di hasi pregunta i amplia bo
konosementu riba rindimentu di e vehikulonan aki durante e 3 dia di eksposishon.
Durante wikent lo tin diferente “Master Class” renashoná ku e tema ambiental i ku
partisipashon di dos Guest Speaker, unu lokal i unu for di Aruba. Dr. Manfred van Veghel,
director di CARMABI i Dr. Diego Acevedo, katedratiko di Universidat di Aruba i
espesialista internashonal riba medio ambiente. Entrada pa e EXPO i tur konferensha ta
kompletamente gratis. Tambe lo tin bishita di diferente organisashon ambiental i defensor di nos medio ambiente. Awe lo yega for di Colombia un delegashon di 6 representante di Corpoguajira ku lo pertisipá den e evento komo invitadonan speshal
Pues e oportunidat pa konektá i interkambiá informashon lo bai tuma lugá dianan 12, 13, 14 di Desember den “Exhibition Hall” di Sambil den ECOEXPO Conference Curacao 2025.
Empresanan, profeshonalnan i publiko en general lo bini huntu durante 3 dia di charla,
exposishon i “Networking” tokante temanan relashoná ku energía renovabel, autonan
elektriko, medio ambiente i kambio klimatiko na diferente nivel i kon pa afrontá ku eksito
e retonan di futuro, (Komersial, profeshonal i personalmente) komo konsekuensha di e
fenómeno aki.
Bou di e moto… Ban Pa bai! Kòrsou lo biba un fin di siman kompleto di eksperiensha i
konosementu, además di dibertishon den famia… Sambil lo bira e Sentro di Emoshon na
Kòrsou pa drenta den e trayekto di bida ku un medio ambiente limpi, saludabel i sustentabel.
Ban pa Bai!
