Promé Minister Pisas i organisashonnan di penshonado ta sera konvenio nashonal riba AOV

Willemstad – Promé Minister Pisas i e organisashonnan di penshonadonan UPAH, APT, MPK, i APPK a firma awe un konvenio nashonal pa konkluí e diskushonnan públiko riba indeksashon di e montante di e Seguro General di Behes, e asina yama “AOV”. E konvenio aki ta representá un kompromiso balansá i sostenibel den futuro ku, di un banda, ta mehorá e posishon di entrada di benefisiarionan di AOV i, di otro banda, no ta pone sostenibilidat finansiero di e sistema di AOV i finansa públiko na peliger.

E partidonan a bai di akuerdo ku e benefisio di AOV lo wòrdu oumentá te ku XCG 1000 pa luna entrante 1 di yanüari 2026. Ademas, un “lumpsum” di XCG 2500 lo wòrdu otorgá na benefisiarionan di AOV komo kompensashon pa pèrdida den nan poder di kompra pa e periodo te ku 31 di desèmber 2020. E “lumpsum” aki lo wòrdu pagá den dos pago igual na yanüari 2026 i yanüari 2027, miéntras e montante lo dependé di e kantidat di aña ku un residente a akumulá derechi riba AOV. Ku esaki partidonan ta konkluí e diskushon públiko riba AOV, i for di 2026 pa dilanti lo implementá un kuadro nobo pa e indeksashon anual di benefisionan di AOV, mará na e índise di preis di konsumidó (CPI) i e desaroyo ekonómiko real manera kalkulá dor di Ofisina Sentral di Estadístika (CBS).

E akuerdo a wòrdu presedí pa konsultanan intensivo entre representantenan di gobièrnu i e organisashonnan di penshonadonan i ta basá parsialmente riba konsehonan independiente di Banko Sentral di Kòrsou i Sint Maarten i Kolegio di Supervishon Finansiero (Cft). Na final, ámbos partido a opta pa un solushon ku ta sosial y finansieramente responsabel, i tambe praktikamente faktibel.

Promé Minister Pisas ta enfatisá ku e akuerdo ta kontribuí na stabilidat sosial y klaridat pa e penshonadonan: “Ku e akuerdo aki, nos ta trese un diskushon largu na un konklushon positivo nèt promé ku fin di aña, miéntras ku simultáneamente ta trese klaridat pa futuro. Esaki ta na bienestar di e penshonadonan i e pais den su totalidat. Mi ta hopi kontentu ku e resultado aki  i ta yama danki pa e organisashonnan di penshonadonan pa nan pasenshi i dedikashon pa huntu yega na un bon solushon.”

E organisashonnan di penshonadonan tambe ta indiká ku e akuerdo ta representá un paso importante den direkshon di siguridat i previsibilidat pa benefisiarionan di AOV. Oswin Martina, Presidente di Unidad di Penshonadona, i Wimbert Hato, negoshadó prinsipal na nòmber di e kuater organisashonnan di penshonado, ámbos ta ekspresá di ta “hopi kontentu” ku e resultado di e negosiashonnan ku Promé Minister Pisas y su tim di minister y konseheronan.

Banko di Seguro Sosial (SVB) pronto lo kuminsá ku preparashonnan pa ehekushon di e akuerdo, di manera ku na yanüari 2026 benefisiarionan di AOV por tin akseso kaba na e oumento di AOV i mitar di e “lumpsum” ku lo wòrdu otorgá pa SVB.