Den un ambiente festivo ‘Karnaval Den Bo Bario’ a sigui 

Den un ambiente festivo ‘Karnaval Den Bo Bario’ a sigui 

Djadumingu tras di lomba dilanti botika Tera Kòrá, Task Force Karnaval Bándabou den koperashon ku  Beehives, tabatin e asina yamá Karnaval Den Bo Bario. Esaki tabata e dos edishon, kalentando pa e  temporada di karnaval 2026.  

Presidente di Task Force Karnaval Bándabou a habri e anochi gradisiendo i yamando bon biní na tur esnan  presente. E embaharodnan di karnaval 2025 tambe a forma parti di e ambiente. E anochi a sigui ku  akompañamentu musikal di DJ Eyez, Brassband PCD i Grupo di aguinaldo Dushi Ambiente. Banda di  esaki, Task Force Karnaval Bándabou a sigui ku benta di e ‘bucket hat’ pa asina sigui rekouda fondo.  

E gruponan di Karnaval di Bándabou ku tambe ta den preparashon pa e marcha di karnaval dia 14 di  febrüari awor, a duna informashon na esnan presente i tuma inskripshon. E gruponan ta hopi entusiasmá i  ta trahando ku ánimo pa por presentá un produkto bunita i kreativo.  

‘Karnaval den bo Bario’ ta otro di e proyektonan bou di enkargo di Task Force Karnaval Banda Bou. Meta  di esaki ta pa stimulá i kultivá e selebrashon karnavalesko bèk den Bándabou i su barionan. Un seri di  selebrashon ku sin duda lo oumentá e deseo partisipativo en espera di e marcha di dia 14 di febrüari  próksimo.