Vise Presidente di ‘Raad van State’ a hasi un bishita di kortesia na Parlamento di Kòrsou.

Djabièrnè, 9 di yanüari 2026, Presidente di Parlamento i miembronan di Komishon di Asuntunan di Reino, Relashonnan Interparlamentario i Relashonnan Eksterior, a risibí bishita di Visepresidente di ‘Raad van State’, sr. Thom de Graaf huntu ku algun miembro di Raad van State (Staatsraad) sr. Paul Comenencia i sr. Han Polman.

Durante e enkuentro, a duna espasio pa un diálogo informal i konstruktivo riba algun tópikonan, manera e proseso rondo di e konsepto di Lei di Reino pa Areglo di Disputa (Geschillenregeling) i kon por saka mayor probecho for di e areglonan den Statüt manera e ta aktualmente.

Na final di e bishita, Presidente di Parlamento, sr. Fergino Brownbill, a entregá sr. Thom de Graaf un regalo simbóliko komo rekordatorio di su bishita na Parlamento di Kòrsou.