DVG ta informa Vacuna di COVID ta disponibel pa grupo di risico
DVG ta informa
Vacuna di COVID ta disponibel pa grupo di risico
ORANJESTAD, Aruba – 12 januari 2026: Pa e grupo di ciudadanonan cu tawata warda riba e vacuna di covid, DVG ta informa cu esaki ta disponibel y por yama traha un cita.
E virus di covid ta sigui circula. Apesar cu e virus ta wordo considera un virus respiratorio mas dentro di e grupo grandi di virusnan cu ta afecta e sistema respiratorio, covid y influenza ta keda e dos virusnan mas peligroso cu por ocaciona complicacion serio y asta morto cerca e grupo di risico den nos comunidad.
Bou grupo di risico ta referi na:
- Adulto mayor di 60 aña of mas
- Persona cu malesa cronico of condicion di salud manera (asma, diabetes, problema di curason, presion halto, sistema inmunologico debil etc)
- Ciudadano cu obesidad
- Hende muhe na estado
Pa e grupo di risico aki riba menciona e vacuna di covid ta completamente GRATIS. E grupo di risico bou 60 aña cu ta sufri di un di e condicionnan menciona mester presenta cu un reseta di dokter di cas of specialista y prueba di AZV. E adulto mayor riba 60 aña mester presenta unicamente cu su carchi di AZV. (no mester di reseta).
E vacuna di covid ta wordo aplica unicamente riba diaranson y ta necesario pa haci un cita na DVG door di yama na telefoon 5224200.
Banda di vacuna contra covid of influenza ta importante pa aplica tambe medidanan di prevencion pa evita di keda contagia of di contagia un otro cu un virus respiratorio. E medidanan aki ta encera:
- Laba man frecuentemente cu awa y habon of usa handsanitizer
- Tapa boca ora di tosa of nister cu nepkins of haci esaki den bo elleboog.
- No bishita lugar publico si bo ta sinti malo y tin sintoma.
- Evita contacto directo cu hende malo.
- Evita di mishi cu bo wowo, nanishi y boca innecesariamente
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw
