Plan di accion pa mantencion di veldnan deportivo ta sigui den 2026 y trabounan a inicia na veld di Sabana Grandi
Plan di accion pa mantencion di veldnan deportivo ta sigui den 2026 y trabounan a inicia na veld di Sabana Grandi
ORANJESTAD — Siguiendo cu e strategia pa un maneho sostenibel di instalacionnan deportivo na Aruba, Ministerio di Deporte, ta anuncia cu e plan di accion pa mantencion ta continua sin duda den 2026.
E prome trabou pa e aña nobo aki ya a inicia cu mantencion integral di veld di Sabana Grandi, un paso importante pa sigura cu infrastructura deportivo ta keda na condicion optimal pa uzo di comunidad y deportista.
Ta ehecuta e trabou den colaboracion estrecho entre e Ministerio di Deporte y Ministerio di Infrastructura hunto Departamento di Obranan Publico (DOW), cu su ekiponan tecnico ta sigui traha de forma structural y periodico riba e canchanan y veldnan deportivo rond di isla. E plan pa 2026 ta bay forma riba e base di exito di e plan di accion anterior, cu a keda implementa den 2025 y cu a trece mehoracion concreto na diferente facilidadnan.
Minister di Deporte Gerlien Croes a enfatisa cu mantencion ta un elemento fundamental pa un desaroyo deportivo creciente: “Mantencion ta clave pa sostenibilidad. Nos ta kere den deporte como un instrumento di desaroyo social y saludabel, y infrastructura na bon condicion ta esencial pa logra esaki. Nos ta compromete pa continua na traha cu transparencia, planificacion y eficiencia pa sirbi nos pueblo manera e merece”.
E continuidad di e plan ta enfoca riba implementacion di un sistema di mantencion preventivo y periodico, garantisando un uzo responsabel di fondo publico y un forma di traha cu ta benificioso tanto pa comunidad como pa deportistanan.
Minister Gerlien Croes a expresa su gradicimento na DOW y na tur colaboradornan cu ta forma parti di e proyecto, y a enfatisa cu e ministerio ta mira dilanti pa amplia e programa di mantencion na mas canchanan y veldnan deportivo durante e resto di aña 2026.
