Deporte di triatlon ta conta di nan plannan pa 2026

Comite Olimpico Arubano a reuni cu Aruba Triathlon Association

Ayera tardi na Comite Olimpico Arubano COA, e departamento tecnico “Direccion di Deporte” (DdD) a continua cu e serie di reunionnan den cuadro di 2026. Den e caso aki, a reuni cu Aruba Triathlon Association (ATA) pa asina repasa e plan di entrenamento cu nan a entrega fin di aña pasa cu ta splica kico e plannan ta pa e aña calendario aki.

Den caso di ATA, a combersa cu Presidente Gelou Wever, y entrenadornan Glennon Eights y Lucienne Dirksz cu a duna splicacion amplio di e proceso tecnico cu lo hiba, ademas di duna di conoce e atletanan cu lo ta den e proceso. Banda di esaki, a detaya cua eventonan tin planifica pa participacion. Claramente esaki ta inclui e diferente Weganan cu lo tuma luga e aña aki.

COA ta gradici ATA pa e reunion informativo y ta alabes felicita nan pa e proceso cu ta tumando luga.