Pa fortifiká transparensia di dato monetario i di sektor eksterno CBCS ta lansa dashboardnan interaktivo pa mehorá aksesibilidat na estadístika
PB2026-002
Pa fortifiká transparensia di dato monetario i di sektor eksterno
CBCS ta lansa dashboardnan interaktivo pa mehorá aksesibilidat na estadístika
Willemstad/Philipsburg –Centrale Bank van Curaçao en Sint Maarten (CBCS) ta anunsiá lansamentu di dos dashboard estadístiko interaktivo nobo: e Monetary & Financial Statistics Dasboard i e External Sector Statistics Dashboard1. E instrumento aki ta un parti importante di e strategia mas amplio di CBCS pa fortifiká visualisashon di dato i pa mehorá aksesibilidat, transparensia i klaridat di estadístika ofisial pa un grupo amplio di usuario.
E Monetary & Financial Statistics Dashboard ta duna un bista visual di desaroyo di krédito, sifranan monetario, tendensianan den e sistema finansiero i otro indikadónan importante den union monetario. Pa medio di e instrumento dinámiko aki usuarionan por interpretá e desaroyo monetario i finansiero mas mihó i den un forma visual intuitivo i fásil pa nabegá.
E External Sector Statistics Dashboard ta duna informashon riba e desaroyonan den e balansa di pago, fluho di komèrsio di produkto i servisio, tendensia di invershon i otro indikadónan di sektor eksterno. Esaki ta yuda usuarionan komprendé e vulnerabilidat eksterno di e union monetario i e konekshon ekonómiko ku merkado global mas mihó.
E dashboardnan aki ta esensial den e esfuerso kontinuo di CBCS pa modernisá e manera di presentá informashon estadístiko. Dor di presentá estádistika mas dinámiko i interaktivo, CBCS ta pèrkurá pa:
- mehorá aksesibilidat na dato ekonómiko kompliká;
- oumentá transparensia i konosementu públiko;
- sostené toma di desishon basá riba sifra; i
- promové uso mas amplio di estadístika ofisial den investigashon, planifikashon i formulashon di maneho.
Ámbos dashboard ta permití usuario pa analisá tendensia den un forma interaktivo, eksportá dato i inkorporá informashon den nan propio análisis i proseso di desishon. Mayoria dato ta disponibel na nivel di union monetario, pero tambe separá pa Kòrsou i Sint Maarten.
Konsekuentemente, stipuladó di maneho, investigadó, instituto finansiero, periodista, studiante i públiko general awor tin akseso na dato makroekonómiko importante di un forma mas fásil.
Den futuro serkano, CBCS tin planeá pa amplia su dashboardnan ku introdukshon di un dashboard pa estadístika di sektor real i sektor públiko. E adishonnan aki lo krea un pakete mas kompleto di dato interaktivo, ku ta permití usuario pa eksplorá desaroyonan ekonómiko den tur sektor prinsipal
1 https://www.centralbank.cw/statistics-dashboards/dashboards
pa medio di un solo plataforma. CBCS tambe tin plan pa introdusí dato di pronóstiko di término mediano di indikadónan ekonómiko klave, pa fortifiká e balor di e dashboardnan pa análisis enfoká riba futuro i evaluashon di maneho.
Ku e inisiativa aki, CBCS ta reafirmá su kompromiso pa proveé dato ekonómiko aktual, konfiabel i di haltu kalidat den un forma ku ta fásil pa eksplorá, visualisá i interpretá.
Willemstad, 19 di yanüari 2026
CENTRALE BANK VAN CURACAO
