Desishonnan di djárason 28 di yanüari 2026

Desishonnan relashoná spesífikamente ku asuntunan di pais riba nivel nashonal di djárason, 28 di yanüari 2026:

1. Aprobashon di e dokumento “Visiekader Binnenstad 2026–2035” den konsepto (Ministerio di Tráfiko, Transporte i Plnanifikashon Urbano i Ministerio di Desaroyo Ekonómiko)

Konseho di Minister a aprobá e dokumento den konsepto titulá “Visiekader Binnenstad 2026–2035” pa desaroyo espasial, ekonómiko i di herensia (kultural) den sentro di Willemstad. Ministerio di Tráfiko, Transporte i Planifikashon Urbano ta keda responsabel pa e parti di ehekushon. Den un periodo di tres luna lo prepará un plan di implementashon huntu ku Ministerio di Desaroyo Ekonómiko.

---

2. Enfoke nobo pa mehorá maneho finansiero (Ministerio di Finansa)

Konseho di Minister a aprobá un aserkamentu nobo pa mehorá e maneho finansiero di Kòrsou. Den e kuadro akí, lo instalá un komishon di maneho nobo i deskontinuá e “Program Board Roadmap”. Tambe a aprobá e plan di akshon ku ta akompañá esaki.

---

3. Instrukshonnan pa Konseho di Minister di Reino dia 30 di yanüari 2026 (Ministerio di Asuntunan General)

Konseho di Minister a aprobá instrukshonnan na Minister Plenipotensiario pa Konseho di Minister di Reino di dia 30 di yanüari 2026. Esakinan ta relashoná ku:

• e presupuesto 2026 di Sint Maarten (rekonosementu i apstenshon);
• e rapòrt di e kumbre di G20 (Johannesburg, novèmber 2025);
• e Tratado di Konseho di Oropa kontra komèrsio di órganonan humano;
• i e kambio den e Lei di Patente di Reino (Rijksoctrooiwet) 1995.

---

4. Aprobashon di e Programa di Gobernashon 2025–2029 (Ministerio di Asuntunan General)

Konseho di Minister a aprobá e Programa di Gobernashon 2025–2029. Lo monitoriá progreso di esaki kada kuartal i raportá na Konseho di Minister. Despues di algun ahuste editorial, e programa di gobernashon lo keda entregá na Parlamento i publiká.

---

5. Kambio den Dekreto Nashonal tokante e Komishon di AML/CFT/CFP (Ministerio di Asuntunan General)

Konseho di Minister a aprobá un kambio den e tareanan i kompilashon di Dekreto Nashonal tokante e Komishon di AML/CFT/CFP fechá 25 di mart 2021. Despues ku Gobernador firma e teksto aktualisá lo publiká esaki ofisialmente.

---

6. Tarifanan nobo di kombustibel entrante febrüari 2026 (Ministerio di Desaroyo Ekonómiko)

Konseho di Minister a aprobá tarifanan nobo pa produktonan di kombustibel regulá entrante 3 di febrüari 2026, segun konseho di Regulatory Authority of Curaçao (RAC). E komponentenan di tarifa eksistente pa garantisá suministro di kombustibel lo keda na vigor. E tarifanan ahustá lo wòrdu publiká.

---

7. Tarifanan nobo pa koriente i awa entrante febrüari 2026 (Ministerio di Desaroyo Ekonómiko)

Konseho di Minister a aprobá e tarifanan nobo pa koriente i awa entrante promé di febrüari 2026, segun konseho di Regulatory Authority of Curaçao (RAC). E tarifanan lo wòrdu anunsiá ofisialmente.